VOV4.Sêdang - Pôa Phạm Minh Chính, Ngế pro xiâm hnê ngăn tơnêi têa nếo ai roh pêi cheăng ƀă Vi ƀan kong pơlê Bình Dương ‘na hbrâ mơdât pơreăng COVID 19 ƀă mơnhông cheăng kâ – rêh ối pơlê pơla. Klêi kơ’nâi tơmâng kong pơlê Bình Dương tơbleăng tơdroăng hbrâ mơdât pơreăng ƀă tơdroăng cheăng kâ – rêh ối pơlê pơla ƀă rơkong tơpui dêi mâu Khu xiâm, kơvâ cheăng. Ngế pro xiâm hnê ngăn tơnêi têa kheăn kơdeăn tơdroăng hbrâ mơdât pơreăng ƀă mơnhông cheăng kâ – rêh ối pơlê pơla a Bình Dương.

Pôa Phạm Minh Chính, Ngế pro xiâm hnê ngăn tơnêi têa pêi cheăng ƀă kong pơlê Bình Dương

Pơreăng xuân kâi châ mơdât, mơdêk cheăng kâ lối 7%, pêi lo liăn ngân lối 60%, tơdroăng rêh ối kuăn pơlê tá hâi tơdjâk hên, troăng hơlâ kum rêh ối pơlê pơla châ pơtối rak pêi pro tơtro. Kố cho mâu tơdroăng ki bâ eăng dêi Bình Dương tung 6 khế apoăng hơnăm, kal mơnhông tơtro, pơtối xo vế túa ki rơkê tơtro. Tối hdrối tơdroăng la ngiâ kô pơtối ôh tá tơniăn tâ, pá vâ mơdât xua mâu ngế F0 tá hâi ‘nâi xiâm kối ki tâ tú. Tâng ôh tá kâi mơdât pơreăng kô tơdjâk tâi tâng tơdroăng pêi pro hnoăng cheăng kal kí ing kố troh mơ’nui hơnăm, ki má lối cho mơdêk cheăng kâ – rêh ối pơlê pơla. Xua mê, thế ngăn tiô tơdroăng, mơjiâng troăng pêi ki tơtro, chiâng vâ pêi pro, châ tơƀrê.

A Sa Ly tơplôu ƀă tơbleăng