VOV4.Sêdang - Kơxê lơ 11/7, pôa Phạm Minh Chính, Ngế pro xiâm hnê ngăn Chin phuh ai roh pêi cheăng ƀă khu râ kăn pơkuâ Pơlê kong kân Hồ Chí Minh ƀă lăm séa ngăn tơdroăng hbrâ mơdât pơreăng a Pơlê kong kân Hồ Chí Minh. Xông tơpui a roh pêi cheăng, Ngế pro xiâm hnê ngăn tơnêi têa tối nhên, tơdroăng pêi pro pơkâ 16 ƀă pơlê kong kân cho môi tơdroăng pêi ki pá, laga troh nôkố mơnhên kố cho pơkâ ki tro, môi tuăn hlê plĕng, mơnhên tơdroăng ki xiâm, tơdroăng pêi pro tro tơdrêng.

Pôa Phạm Minh Chính, Ngế pro xiâm hnê ngăn Chin phuh ai roh pêi cheăng ƀă khu râ kăn pơkuâ Pơlê kong kân Hồ Chí Minh

Ngế pro xiâm hnê ngăn tơnêi têa kheăn kơdeăn tơdroăng pơlê kong kân Hồ Chí Minh pêi pro rơtế 2 hnoăng cheăng rế hbrâ mơdât pơreăng rế mơnhông cheăng kâ – rêh ối pơlê pơla. Ngế pro xiâm hnê ngăn tơnêi têa pơkâ kal mơnhông mâu tơdroăng ki chiâng pêi pro, ti tăng xiâm kối mâu tơdroăng pêi tá hâi châ tơƀrê vâ rơnêu drêng pêi pro.

Kơjo hbrâ mơdât pơreăng, rak ngăn tơdroăng rêh ối kuăn pơlê, ôh tá ăm kuăn pơlê kơklêa, lơ ôh tá ai hmân ếo sâp, kơdroh mâu roh ngế hlâ. Ngế pro xiâm hnê ngăn tơnêi têa pơchân, pơreăng xông tâ tú ôh tá ‘nâi tối hdrối, xua mê, drêng pêi pro thế ngăn tiô ƀă nhuô̆m tơdroăng nôkố, xo tơdroăng ki ai khât nôkố pro rĕng, ôh tá kal pêi pro tŭm, ôh tá thâ, rế pêi rế xo vế túa ki rơkê tơtro.

A Sa Ly tơplôu ƀă tơbleăng