VOV4.Sêdang - A tơbleăng mơgêi dêi pôa Phạm Minh Chính, Ngế pro xiâm hnê ngăn tơnêi têa a roh trâm mâ ƀă mâu ngế cheăng khoa hok, mâu tíu pêi cheăng khu tê mơdró hriăn plĕng, mơjiâng bro vaccine hbrâ mơdât COVID 19, Ngế pro xiâm hnê ngăn tơnêi têa pơkâ tơkŭm tah lôi mâu tơdroăng pá puât, tơvâ tơvân ‘na luât, troăng hơlâ tiô troăng pêi tiô tơdroăng ki ai nôkố, pro tơ’lêi hlâu má môi ăm tơdroăng hriăn plĕng, pơcháu ăm kơmăi kơmok ƀă mơjiâng vaccine.

Pôa Phạm Minh Chính pơkâ ‘na hlê plĕng môi tuăn vaccine thế ai troăng pơkâ, troăng pêi ton xŏn tung hbrâ mơdât pơreăng tối tơdjuôm ƀă tung hbrâ mơdât COVID 19 tối krê, tơdrêng amê, thế ối tung troăng pêi ton xŏn tŭm têk hriăn plĕng, pơcháu ăm kơmăi kơmok, mơjiâng pro vaccine vâ rế hbrâ mơdât pơreăng rế kơdĭng liăn ngân tơnêi têa tá nôkố ƀă ton xŏn.

‘Na hnoăng cheăng, troăng pêi la ngiâ, Ngế pro xiâm hnê ngăn tơnêi têa pơkâ thế mơjiâng troăng pêi ton xŏn, Tơdroăng tơnêi têa, Pơkâ pêi ton xŏn, tŭm têk vâ hriăn plĕng mơjiâng pro, pơcháu ăm kơmăi kơmok mơjiâng pro vaccine, ki rơhêng vâ tối cho vaccine hbrâ mơdât COVID 19.

A Sa Ly tơplôu ƀă tơbleăng