VOV4.Sêdang - Kơxê lơ 19/7/2021, pôa Phạm Minh Chính, Ngế pro xiâm hnê ngăn Chin phuh hiăng tơpui phôn ƀă pôa Rodrigo Duterte, kăn xiâm pơkuâ kong têa Philipines drêng tơbâ 45 hơnăm mơjiâng tơrŭm cheăng tơpui kâ pơla Việt Nam-Philippines a hâi lơ 12/7. Pôa Phạm Minh Chính tối nhên, Philipines đi đo cho kong têa tơrŭm cheăng ki kal, loi tơngah, tơpui tối hên tơdroăng ki tơmâng ngăn ƀă ki pơxúa ‘na tơdroăng cheăng tung la ngiâ ƀă Việt Nam;

Pôa Phạm Minh Chính, Ngế pro xiâm hnê ngăn tơnêi têa tơpui phôn ƀă kăn xiâm pơkuâ kong têa Philipnines

tối nhên tơrŭm cheăng pơla péa tơnêi têa hiăng ôh tá la lâi pơtê ‘mâi mơnhông, tơbêng tung plâ 45 hơnăm hdrối nah sap ing mơjiâng tơrŭm cheăng Việt Nam - Philippines tung mâu kơvâ cheăng, tơkŭm tung mâu tơdroăng ki kal, môi tiah: tơbleăng tơdroăng ki tơƀrê ‘na hneăng hơnăm 2019 – 2024, mơdêk pơtroh mâu kăn châ trâm khu kăn xiâm ƀă rêm râ, rĕng tơbleăng mâu tơdroăng tơrŭm cheăng pơla péa pâ tiô tơdroăng hbrâ rơnáu; mơdêk ƀă pêi pro trâu hơngế tâ nếo tơrŭm gak kring pơlê pơla cheăm bêng, tê mơdró ‘no liăn cheăng; pro tơ’lêi hlâu ƀă mơhnhôk mâu khu mơdró kâ péa tơnêi têa ‘no liăn, tê mơdró tung mâu kơvâ cheăng ki péa pâ hiăng ai hlâu ƀă rơdêi.

Katarina Nga tơplôu ƀă tơbleăng