VOV4.Sêdang - Kơxê lơ 13/7, a tíu pêi cheăng Chin phuh, pôa Phạm Minh Chính, Ngế pro xiâm hnê ngăn tơnêi têa hiăng pêi cheăng ƀă Khu xiâm ngăn Mơhno túa lĕm tro pơtâp ivá ƀă Ôm hyô ‘na hnoăng cheăng pơtâp ivá ƀă trâm mâ mâu ngế ki tơ’noăng rơkê veăng tơ’noăng Olympic Tokyo 2020. Tơpui a rôh pêi cheăng, pôa Phạm Minh Chính tối nhên, tơdroăng hriâm tâp ivá, mơdêk ivá rơdêi ăm pơlê pơla cho môi troăng hơlâ pơkâ ki kân dêi Đảng, Tơnêi têa pin.

Ai ivá rơdêi nếo mơjiâng tơnêi têa, la ngiâ ah, mâu ngế ki tơ’noăng phiu ro teăng mâ ăm mơngiơk hlá cơ, mơngiơk ếo tơnêi têa veăng tơ’noăng Olympic Tokyo 2020. Kố cho tơdroăng hâk tơngăm dêi kơvâ tơ’noăng ivá, ăm ngế krê ki tơ’noăng. Malối cho pơtâp ivá ăm mâu ngế ki chó chêng tơvê kŏng. Ngế pro xiâm hnê ngăn tơnêi têa khĕn kơdeăn mâu tơdroăng tơ’noăng rơkê ki khu tơ’noăng ivá Việt Nam hiăng châ kâ tung pơla hdrối kố nah malối cho hiâm mơno tơ’noăng dêi pin rế hía rế khên tơnôu.

Drêng kố, Ngế pro xiâm hnê ngăn tơnêi têa xuân pơtroh rơkong mơhnhôk ƀă pơtroh rơkong rơkâu troh tâi tâng mâu ngế ki tơ’noăng a rôh tơ’noăng Olympic Tokyo 2020.

Katarina Nga tơplôu ƀă tơbleăng