VOV4.Sêdang - Kơxê hâi lơ 22/6/2021, pôa Phạm Minh Chính, Ngế pro xiâm hnê ngăn tơnêi têa hiăng tơpui phôn ƀă jâ Angela Merkel, Ngế pro xiâm hnê ngăn kong têa Alơmăng. A roh tơpui phôn, péa Ngế pro xiâm hnê ngăn tơnêi têa phiu ro ‘na mâu tơdroăng châ tơƀrê tơrŭm trâu hơngế pơla péa tơnêi têa tung lối 45 hơnăm hiăng hluâ sap ing hâi mơjiâng tơrŭm cheăng tơpui kâ. Pôa Phạm Minh Chính mơnhên tối, Việt Nam đi đo nhuô̆m tơrŭm cheăng ton xŏn ƀă kong têa Alơmăng, pói vâ pro trâu hơngế tâ tơrŭm cheăng achê ƀă loi tơngah pơla péa tơnêi têa tung rêm kơvâ cheăng.

Pôa Phạm Minh Chính, Ngế pro xiâm hnê ngăn tơpui phôn ƀă jâ Angela Merkel, Ngế pro xiâm hnê ngăn kong têa Alơmăng

Jâ Angela Merkel tối Việt Nam cho khu tơrŭm cheăng ki kal tung troăng hơlâ pơkâ pêi la ngiâ troh kơpong dêi kong têa Alơmăng, nhuô̆m tơrŭm cheăng Việt Nam – Alơmăng ƀă tối rơdêi péa tơnêi têa dế ai hên roh tơ’lêi hlâu ƀă tơdroăng pói vâ kân, kal mơnhông mơdêk ó rơdêi. Vâ thăm pro ăm krá tơniăn ƀă thăm tơrŭm cheăng hên troăng lĕm tro pơla péa tơnêi têa, péa pâ môi tuăn rĕng vêh tơpui tơno pơla khu, trâm mâ khu râ kăn xiâm ƀă thăm tơrŭm cheăng, péa pâ môi tuăn rĕng tơpui tơno pơla khu, trâm mâ khu râ kăn xiâm ƀă thăm tơrŭm cheăng, tung mê, tơtrŏng mơdêk châ tơƀrê Vi ƀan tơrŭm cheăng kâ Việt Nam – Alơmăng.

A Sa Ly tơplôu ƀă tơbleăng