VOV4.Sêdang - Kơxê lơ 29/6, a Tíu pêi cheăng xiâm Đảng, Khu râ kăn Đảng pin xua pôa Võ Văn Thưởng, Kăn pơkuâ hnê ngăn cheăng Đảng pơkuâ xiâm, hiăng veăng Hneăng hôp khu râ kăn mơ’no tơdrêng tung um tơvi mâu râ kăn Đảng xiâm Rusi – ASEAN. Hneăng hôp châ tơkŭm po tiô troăng tơmiât pêi dêi Đảng kong têa Rusi môi tuăn tung pơla hơnăm 2021 cho hơnăm leh tơbâ 30 hơnăm mơjiâng tơrŭm cheăng Rusi – ASEAN, 25 hơnăm tơrŭm cheăng tơpui kâ ƀă kong têa ê Rusi – ASEAN.

A hneăng hôp, Khu râ kăn pơkuâ Đảng xiâm tối ‘na tơdroăng ki kal thăm gak kring tơniăn ƀă tơrŭm cheăng kơpong châu Á – Thái Bình Dương. Mâu kăn tối nhuô̆m khât tơdroăng tơrŭm cheăng Rusi – ASEAN, môi tuăn thăm tơrŭm cheăng tung mâu kơvâ rak vế kong prâi ƀă mơnhông mơdêk krá tơniăn, gak kring tơdroăng lâp plâi tơnêi, tơniăn kế kâ.

Rêm pâ xuân môi tuăn ‘na tơdroăng ki kal thăm tơrŭm cheăng mâu Đảng lâp plâi tơnêi vâ pro trâu hơngế tâ tơrŭm kal kí, cheăng kâ ƀă rêh ối pơlê pơla pơla kong têa Rusi ƀă mâu kong têa ASEAN; môi tuăn thăm mơnhông mâu tơdroăng mơ-eăm tơdjuôm vâ tơkâ hluâ mâu pơloăng mơnúa lâp plâi tơnêi ƀă tơleăng mâu tơdroăng kơpong.

A Sa Ly tơplôu ƀă tơbleăng