VOV4.Sêdang - Kơxê lơ 9/7, pơkuâ po rôh hôp ‘no tơdrêng ing um tơvi pơla Khu hnê mơhno cheăng tơnêi têa ƀă 2 to kong pơlê Phú Yên ƀă Khánh Hòa, pôa Vũ Đức Đam, Ngế pro xiâm phŏ hnê ngăn tơnêi têa, kăn xiâm hnê mơhno cheăng tơnêi têa pơchân 2 kong pơlê kố pêi pro kơtăng mâu tơdroăng pơkâ hbrâ mơdât COVID-19 tung kơpong ki mơdât mot lo ƀă klâ krê mâu kong pơlê, tiô túa pơkâ ki vê hdró kơpong mơdât mot lo, klâ krê pơlê pơla ki kŭn la rak ngăn krá tơniăn tâ tơdroăng pơkâ tung lâp lu la ôh tá pêi pro kơtăng.

Pôa Vũ Đức Đam, Ngế pro xiâm hnê ngăn tơnêi têa hôp ‘no tơdrêng tung um pơla péa kong pơlê Phú Yên, Khánh Hòa

Tung 1 măng tĭng vêh ngi kố, kơxô̆ ngế tâ pơreăng a kong pơlê Phú Yên hlo rế tâk, rêm hâi ai sap ing 30 – 40 ngế. Nôkố, Phú Yên hiăng xúa tơdroăng pơkâ thế klâ krê pơlê pơla tiô pơkâ 16 tung lâp kong pơlê. Ƀă vâ chê 190 ngế tâ COVID-19 hiăng châ ‘nâi, kong pơlê Khánh Hòa pơkâ xúa klâ krê pơlê pơla tiô pơkâ 16 ƀă Pơlê kong kơdrâm Nha Trang, pơlê kân Ninh Hòa ƀă tơring Vạn Ninh.

Hlo tơdroăng ki péa kong pơlê Phú Yên ƀă Khánh Hòa xúa tơdroăng ki mơdât mot lo ƀă klâ krê pơlê pơla tiô pơkâ ki phá tơ-ê dêi rơpó, pôa Vũ Đức Đam, Ngế pro xiâm phŏ hnê ngăn tơnêi têa pơchân ki kal nôkố cho hiăng hbrâ mơdât klâ krê pơlê mê athế pêi pro tơniăn ƀă kơtăng.

Katarina Nga tơplôu ƀă tơbleăng