VOV4.Sêdang - Kơxo lơ 12/7, a Tíu pêi cheăng Chin phuh, pôa Vũ Đức Đam, Ngế pro xiâm phŏ hnê ngăn tơnêi têa, Kăn pơkuâ Khu hnê mơhno Tơnêi têa hbrâ mơdât COVID 19 pơkuâ roh hôp tơpui tơno mơ’no tơdrêng tung um tơvi ƀă Khu râ kăn pơkuâ Pơlê kong kân Hồ Chí Minh ‘na tơdroăng hbrâ mơdât pơreăng nôkố. A roh hôp tơpui tơno, pôa Vũ Đức Đam tối nhên: troh nôkố, mâu kơpong klâ kơtăn tơkŭm hiăng pêi pro dâng 70% ivá. Xua mê, Pơlê kong kân Hồ Chí Minh tơrŭm ƀă Khu xiâm ngăn pơkeăng ƀă khăm pơlât thâ séa ngăn pêi pro klâ kơtăn a hngêi.

Ngế pro xiâm phŏ hnê ngăn tơnêi têa pơcháu Khu xiâm ngăn pơkeăng ƀă khăm pơlât séa ngăn ƀă vêh hriăn plĕng mâu pơkâ ‘na klâ kơtăn a hngêi ăm tơtro ƀă tơdroăng ki ai khât dế nôkố a kong pơlê. Ngế pro xiâm phŏ hnê ngăn tơnêi têa pơchân tối pơlê kong kơdrâm kal tơmâng má môi troh mơngế kơtiê, mơngế ai tơdroăng rêh ối pá puât.

Pơtối mê, pakĭng mâu troăng dêi khu râ kăn pơkuâ dế pêi pro mê kơ koan Măt trâ̆n tơnêi têa Việt Nam mâu râ kơbông krếo mâu khu tê mơdró ƀă kuăn pơlê rơtế tŏng kum khu kố.

A Sa Ly tơplôu ƀă tơbleăng