VOV4.Sêdang - Kơxê lơ 28/6, a tíu pêi cheăng Chin phuh, pôa Vũ Đức Đam, Ngế pro xiâm phŏ hnê ngăn Chin phuh, kăn xiâm Khu hnê mơhno cheăng Tơnêi têa ‘na hbrâ mơdât pơreăng COVID-19 hiăng hôp ‘no tơdrêng ing um tơvi ƀă 5 to kong pơlê: Quảng Ngãi, Bình Thuận, Khánh Hoà, Bình Định, Phú Yên ‘na hnoăng cheăng hbrâ mơdât pơreăng. Nôkố, mâu kong pơlê pơrá pêi pro kơtăng tơdroăng ki mơdêk ivá pơlât, séa ngăn mơheăm, mơdêk kơxô̆ ngế a mâu kơpong klâ ối krê tơkŭm tung hiâm mơno “tá khu pơkuâ tơdroăng kal kí veăng pêi pro kơhnâ, kơtăng hbrâ mơdât pơreăng tung hâi khế ki iâ má môi”.

Pôa Vũ Đức Đam tối tiah kố, cheăng tối tơbleăng tơdroăng kal ‘na mâu F0, F1, F2 pơla mâu kong pơlê dế hrá. Mơni pơreăng a mâu kong pơlê dế tâ tú gá ai ƀă hên ki ê. Ngế pro xiâm phŏ hnê ngăn tơnêi têa pơkâ thế drêng tá hâi ai pơreăng, mâu kong pơlê xuân athế mơdêk tơdroăng ki séa ngăn mơheăm mơ-eăm rak vế tơniăn má môi ăm mâu hngêi pơkeăng; mơnhên mâu kơpong ki mơni kô tâ tú hên vâ hbrâ mơdât.

Katarina Nga tơplôu ƀă tơbleăng