VOV4.Sêdang - Pôa Vũ Đức Đam, Ngế pro xiâm phŏ hnê ngăn tơnêi têa, Kăn pơkuâ Hnê mơhno tơnêi têa ‘na hbrâ mơdât pơreăng COVID 19 nếo hôp mơ’no tơdrêng tung um tơvi ƀă khu râ kăn pơkuâ kong pơlê Đồng Nai. Xông tơpui hnê mơhno a roh hôp, pôa Vũ Đức Đam pơchân tối, Đồng Nai pro vâ môi tiah Pơlê kong kân Hồ Chí Minh, ai lối 500 rơpâu ngế kŏng nhân tung kơpong hngêi kơmăi kơmok, ai kơno tuk, achê ƀă Bình Dương ƀă hía hé, tâng lôi pơreăng châ xông tâ tú kô “pá puât”.

Pôa Vũ Đức Đam, Ngế pro xiâm phŏ hnê ngăn tơnêi têa hôp mơ’no tơdrêng tung um tơvi ƀă khu râ kăn pơkuâ kong pơlê Đồng Nai ‘na hbrâ mơdât COVID 19

Xua mê, kong pơlê kal mơdât tơniăn mơngế lo ing Pơlê kong kân Hồ Chí Minh, Bình Dương lăm a Đồng Nai ƀă tơrôu. Pôa Vũ Đức Đam tối rơdêi, mơdât krá tơniăn ôh tá xê “mơdât tơdroăng mơngế prôk lăm troh dêi pó”, mê kal thăm xúa kŏng ngê̆ thŏng tin vâ pơkuâ mơngế prôk lăm. Tâng ai pơreăng xông tâ tú, khu râ kăn pơkuâ kong pơlê Đồng Nai kal môi tuăn mơdât ôh tá ăm lo pa kong a kơpong ai pơreăng sap ing apoăng, pêi rĕng, tơniăn tŭm rơxế, tơmeăm khoăng vâ khu ƀok thái pơkeăng hmiân tuăn, tơkŭm tơdroăng pêi cheăng hbrâ mơdât pơreăng.

A Sa Ly tơplôu ƀă tơbleăng