VOV4.Sêdang - Kơxêi lơ 12/7, hôp mơ’no tơdrêng tung um tơvi kơpong tơbăng kroăng Cửu Long ‘na tơdroăng hbrâ mơdât pơreăng COVID-19, pôa Vũ Đức Đam, Ngế pro xiâm phŏ hnê ngăn tơnêi têa, Ngế xiâm hnê mơhno cheăng tơnêi têa thế mâu kong pơlê tung kơpong hbrâ rơnáu mâu tơdroăng pơkâ mơdât pơreăng a kơlo ki ó tâ, tung mê, séa ngăn nếo ivá khăm ngăn mơheăm, kơxô̆ hbrâ mơdât pơreăng mơheăm khăm ngăn, ivá khăm ngăn dêi khu cheăng ngăn pơkeăng, mâu tíu khăm pơlât.

A rôh hôp mâu kăn, mâu kong pơlê Tiền Giang, Bến Tre, Hậu Giang, Sóc Trăng, Đồng Tháp, Vĩnh Long, Trà Vinh, An Giang, Kiên Giang, Cà Mau, Bạc Liêu, Cần Thơ tối tơbleăng ăm ‘nâi ‘na pơreăng COVID-19 tâ tú tung mâu kong pơlê. Ing mê, tối kơxô̆ mơngế yương tĭnh ƀă SARS-CoV-2  rế tâk hên ƀă xiâm ki tâ tú cho mâu ki ing Pơlê kong kân Hồ Chí Minh vêh.

Mâu kong pơlê xuân tối nhên mâu tơdroăng ki pá tung pơla tối tơbleăng hbrâ mơdât pơreăng. Pôa Vũ Đức Đam tối nhên kal thế hnê tối, kơbông krếo kuăn pơlê ing pơlê kong kân Hồ Chí Minh vêh tối tơbleăng tơná, chêh inâi ƀă séa ngăn, khăm ngăn ăm ‘nâi ngăn mơheăm vâ ai troăng hơlâ pêi tơtro.

Ngế pro xiâm phŏ hnê ngăn tơnêi têa thế pơlê kong kân Cần Thơ, tíu ki ai hngêi trung Đại học Y dược, hngêi pơkeăng ai ivá cheăng rơkê hbrâ tơdroăng tŏng kum mâu kong pơlê tung kơpong. Khu xiâm ngăn pơkeăng tối tơniăn ing tơmeăm khăm ngăn mơheăm ăm mâu kong pơlê tung kơpong tơbăng kroăng Cửu Long.

Gương tơplôu ƀă tơbleăng