VOV4.Sêang - Kơxo lơ 20/7, pôa Vũ Đức Đam, Ngế pro xiâm phŏ hnê ngăn tơnêi têa pơkuâ djâ khu kăn ki pêi dêi hnoăng cheăng Tơnêi têa lăm pôu, pêi cheăng ƀă mơnhên ngăn hnoăng cheăng hbrâ mơdât pơreăng COVID-19 a Bình Dương. Tíu ki apoăng dêi Khu kăn kố troh séa ngăn cho Kŏng ti pêi cheăng tiô rơnó Yazaki EDS Việt Nam, a pơlê kong kơdrâm Dĩ An. Kŏng ti dế pêi pro túa pơkâ “3 tơdrêng” (kâ – koi – pêi cheăng a hngêi kơmăi) ăm vâ chê 400 ngế kŏng nhân vâ rak tơniăn mơjiâng pro ƀă hbrâ mơdât pơreăng COVID-19.

Klêi kơ’nâi séa ngăn hnoăng cheăng hbrâ mơdât pơreăng a tíu mơdró kâ, Ngế pro xiâm phŏ hnê ngăn tơnêi têa pơkâ thế mâu kŏng ti a kong pơlê Bình Dương drêng tơbleăng túa pơkâ “3 tơdrêng” athế tơbleăng tâi tâng mâu hlá mơ-éa ‘na kŏng nhân ăm khu kăn pơkuâ vâ tơ’lêi hlâu ƀă rĕng tung tơdroăng séa ngăn pơreăng tâng tíu mơdró kâ ai mâu ngế ki tâ, nhôm tâ pơreăng.

A kơxê, pôa Vũ Đức Đam rơtế ƀă khu kăn ki pêi dêi hnoăng cheăng Tơnêi têa hôp ƀă kăn pơkuâ kong pơlê Bình Dương ‘na hnoăng cheăng hbrâ mơdât pơreăng.

Katarina Nga tơplôu ƀă tơbleăng