VOV4.Sêdang - Kơxê lơ 20/7, pôa Vũ Đức Đam, Ngế pro xiâm phŏ hnê ngăn tơnêi têa, kăn xiâm Hnê mơhno cheăng tơnêi têa ‘na hbrâ, tơplâ mơdât pơreăng COVID-19 pêi cheăng ƀă kăn pơkuâ Pơlê kong kân Hồ Chí Minh ‘na hnoăng cheăng hbrâ mơdât pơreăng ƀă tơdroăng ki pâk vaccine. Tiô Ngế pro xiâm phŏ hnê ngăn tơnêi têa, Chin phuh prế Khu hnê mơhno cheăng tơnêi têa ‘na hbrâ, tơplâ mơdât pơreăng COVID-19, malối cho Ngế pro xiâm hnê ngăn Chin phuh tơmâng ngăn khât troh tơdroăng pơreăng a Pơlê kong kân Hồ Chí Minh.

Pôa Vũ Đức Đam, Ngế pro xiâm phŏ hnê ngăn tơnêi têa

Tâng vâ pơchông ƀă kong pơlê Bắc Giang, Pơlê kong kân Hồ Chí Minh ai tơdroăng ki tơviah kân ‘na tơdroăng cheăng kâ rêh ối pơlê pơla, xua mê Chin phuh tối mâu tơdroăng ki xơpá ƀă tơbrêi tơbrêh dêi kuăn pơlê Pơlê kong kân. Ngế pro xiâm phŏ hnê ngăn tơnêi têa tối nhên, tơdroăng ki klâ krê mê athế pêi pro kơtăng. Khu xiâm ngăn pơkeăng ƀă khăm pơlât kô kơjo kum khât ‘na kế tơmeăm xúa ăm Pơlê kong kân, laga, ing tơdroăng pơkâ mơ’no dêi Pơlê kong kân ƀă 18 tơdroăng, hên kế tơmeăm tơpá vâ châ roê, xua mê athế xúa mâu kế tơmeăm ki hiăng ai hlâu ƀă mơ-eăm kơdroh mâu ngế F0 ki cho tá hâi teăm râ ah gá chiâng râ.

Katarina Nga tơplôu [ă tơbleăng