VOV4.Sêdang - Kơxê lơ 14/7, a Hngêi Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i hiăng tơdah pôa Meynardo Los Banos Montealegre, Kăn teăng mâ kong têa Philippines troh trâm mâ tơpui tơno. Xông tơpui a roh tơdah, pôa Vương Đình Huệ pơkâ thế Kăn teăng mâ kong têa Philippines tung hneăng cheăng dêi tơná, tơrŭm thăm pêi pro mâu tơdroăng tơrŭm cheăng pơla Kuô̆k hô̆i Việt Nam ƀă Kuô̆k hô̆i râ má môi ƀă Kuô̆k hô̆i râ má péa kong têa Philippines; tơmiât troh tơdroăng séa ngăn kĭ môi tuăn tơrŭm cheăng pơla péa Kuô̆k hô̆i pro xiâm kối ăm mâu tơdroăng tơrŭm cheăng, vâ tơxâng ƀă tơrŭm cheăng ton xŏn pơla péa tơnêi têa ƀă tơrŭm lĕm tro pơla péa Kuô̆k hô̆i.

Tơdjâk troh tơdroăng gâk kring a têa kơxĭ Biển Đông ƀă tơniăn pơto tơmeăm khoăng drô têa kơxĭ, pôa Vương Đình Huệ môi tuăn ƀă rơkong tơpui tối dêi Kăn teăng mâ kal thăm tơpui tơno, hnê mơhno, môi tuăn troăng tơmiât dêi pó ‘na têa kơxĭ Biển Đông tiô mâu pơkâ hiăng môi tuăn dêi ASEAN, pêi pro tŭm châ tơƀrê DOC ƀă tơrŭm krá tơniăn tung tơpui tơno COC ing nhuô̆m luât lâp plâi tơnêi, ki má lối cho tơkêa dêi Khu lâp kong têa ‘na luât têa kơxĭ hơnăm 1982.

A Sa Ly tơplôu ƀă tơbleăng