VOV4.Sêdang - Kơxo lơ 23/6, pôa Vương Đình Huệ, Kăn xiâm hnê ngăn Kuô̆k hô̆i hiăng hôp mơ’no tơdrêng tung um tơvi ƀă pôa Park Byeong Seug. Pôa Vương Đình Huệ tối nhên, Việt Nam nhoăm khât ƀă púi vâ mơnhông mơdêk tơrŭm cheăng ƀă Hàn Quốc cho kong têa ki tơrŭm kal khât, ƀă cho môi tung mâu khu tơrŭm ki má môi tung tơrŭm ƀă mâu kong têa tung lâp plâi tơnêi dêi Việt Nam.

Pôa Vương Đình Huệ, Kăn xiâm hnê ngăn Kuô̆k hô̆i koh hmât kơ Kăn xiâm hnê ngăn Kuô̆k hô̆i Hàn Quốc

A rôh hôp tơpui tơno, péa ngế Kăn xiâm hnê ngăn Kuô̆k hô̆i rơtế tối, péa pâ kal pơtối mơdêk tơrŭm cheăng pơla péa Kuô̆k hô̆i, péa tơnêi têa ƀă péa tơnêi têa tơbleăng mâu tơdroăng pêi pro, môi tiah: đi đo pơtối rak vế rôh lăm pôu dêi rơpó, trâm mâ tơrá mâu kăn ƀă ăm troăng hơlâ ki tơtro, pro tơ’lêi hlâu vâ mâu kong pơlê ƀă kuăn pơlê péa tơnêi mơdêk tơrŭm cheăng, trâm mâ; mơ-eăm tơkŭm po mâu tơdroăng cheăng ki ai pơxúa khât drêng troh leh tơbâ 30 hơnăm tơrŭm cheăng pơla péa pâ. Tung mê, ai mâu tơdroăng hnê tối ăm dêi rơpó, tơpui tơno pơla mâu kơ koan dêi Kuô̆k hô̆i péa tơnêi têa.

Gương tơplôu ƀă tơbleăng