VOV4.Sêdang - Kơxê măng lơ 12/7, a Hngêi Kuô̆k hô̆i, pôa Vương Đình Huệ, kăn xiâm hnê ngăn Kuô̆k hô̆i hiăng tơpui tơno ‘no tơdrêng ing um tơvi ƀă pôa László Kövér, kăn xiâm hnê ngăn Kuô̆k hô̆i Hungary. Pôa Vương Đình Huệ mơnhên tối khât mâu tơdroăng ki tơniăn lĕm tung tơrŭm cheăng pơla péa tơnêi têa tung pơla hdrối kố nah, tối nhên, Việt Nam đi đo ngăn nhuô̆m ƀă rơhêng vâ mơdêk tơrŭm cheăng tung hên kơvâ cheăng ƀă Hungary, kong têa ki tơrŭm cheăng tung tâi tâng ki apoăng dêi Việt Nam a Trung – Đông – Âu.

Pôa Vương Đình Huệ tối nhên, Việt Nam hbrâ rơnáu pro kông tơdjêp ăm Hungary po rơdâ tơrŭm cheăng ƀă mâu kong têa tung kơpong ASEAN ƀă tơvêh nếo, Việt Nam rơhêng vâ Hungary pơtối tŏng kum, mơdêk rơdêi tâ nếo tơrŭm pơla Việt Nam ƀă mâu kong têa tung Khu tơrŭm châu Âu xuân môi tiah mâu kong têa ki tơrŭm cheăng tung kơpong.

A rôh hôp tơpui tơno, péa ngế kăn xiâm hnê ngăn Kuô̆k hô̆i tối nhên kô ai mâu tơdroăng tơrŭm cheăng ing rôh hôp dêi Vi ƀan tơrŭm Chin phuh po a khế 10 la ngiâ, malối cho mơdêk tơrŭm tung kơvâ kong ngê̆ thong tin, viên thong; pơtối tŏng kum, hnê tối ki rơkê plĕng tung mơjiâng luât, séa ngăn tơdroăng cheăng dêi khu xiâm pơkuâ kơ koan Tơnêi têa ƀă hên ki ê.

Katarina Nga tơplôu ƀă tơbleăng