VOV4.Sêdang - Pôa Vương Đình Huệ, Kăn xiâm hnê ngăn Kuô̆k hô̆i tơpui tơno mơ’no tơdrêng tung um tơvi ƀă pôa Lật Chiến Thư, Kăn xiâm hnê ngăn Vi ƀan pơkuâ Hneăng hôp kăn teăng mâ kuăn pơlê lâp tơnêi têa, cho Kăn xiâm hnê ngăn Kuô̆k hô̆i kong têa Sinuâ. A roh hôp tơpui tơno, péa kăn xiâm hnê ngăn Kuô̆k hô̆i pơrá mơnhên, ki kal tơrŭm cheăng tŭm têk Việt Nam – Sinuâ tung troăng hơlâ tơpui kâ ƀă kong têa ê dêi rêm tơnêi têa, khĕn kơdeăn mâu tơdroăng châ, tơdroăng châ tơƀrê tung tơrŭm cheăng ki kal dêi péa Đảng, péa tơnêi têa, ki má lối cho trâm mâ tơpui tơno tơrŭm cheăng pơla péa Kuô̆k hô̆i tung pơla kố nah.

Vâ thăm tơrŭm cheăng ton xŏn tâi tâng Việt Nam – Sinuâ pơtối trâu hơngế, pôa Vương Đình Huệ pơkâ thế péa pâ thăm trâm mâ khu râ kăn xiâm ƀă mâu khu râ, péa pâ thăm trâm mâ tơpui tơno pơla kuăn pơlê; pơkâ thế kong têa Sinuâ thăm rôe kế tơmeăm khoăng dêi Việt Nam, tơmâng ngăn, hnê mơhno khu tê mơdró péa tơnêi têa tơleăng mơnhên mâu tơdroăng tơkêa bro tơrŭm cheăng ki ối tơvâ tơvân; thăm tơrŭm pơkuâ tíu tơkăng kong a tơnêi tơníu, thăm trâm mâ tơpui tơno, tê mơdró ƀă tơrŭm cheăng pơla mâu kong pơlê.

A Sa Ly tơplôu ƀă tơbleăng