VOV4.Sêdang - Kơxê lơ 20/7, Kuô̆k hô̆i hiăng pêi kêi đeăng tơdroăng tâ phĭu rah xo kăn xiâm hnê ngăn Kuô̆k hô̆i hneăng má XV. Pơtối mê, 475/475 kăn teăng mâ Kuô̆k hô̆i veăng têk kŏng môi tuăn hiăng tơkŭm po têk kŏng ăm tơbleăng pêi pro Pơkâ rah xo Kăn xiâm hnê ngăn Kuô̆k hô̆i.

Pôa Vương Đình Huệ pơtối châ rah xo to pro Kăn xiâm hnê ngăn Kuô̆k hô̆i

Tiah mê, pôa Vương Đình Huệ hiăng pơtối châ rah xo to pro Kăn xiâm hnê ngăn Kuô̆k hô̆i hneăng má XV ƀă kơxô̆ phĭu vâ cho tâi tâng. Ƀă pôu râng hnoăng Kăn xiâm hnê ngăn Kuô̆k hô̆i, pôa Vương Đình Huệ tối kô pêi tâi ivá tơná, rơtế Kuô̆k hô̆i, khu pú hên Viƀan pơkuâ Kuô̆k hô̆i, mâu kơ koan dêi Kuô̆k hô̆i ƀă mâu kăn teăng mâ Kuô̆k hô̆i, pơtối pêi tiô troăng ton ƀă mơnhông khôi túa lĕm 75 hơnăm Kuô̆k hô̆i Việt Nam, pơtối pơ’lêh nếo troăng pêi, mơdêk ki dâi lĕm ƀă châ tơƀrê tơdroăng pêi cheăng dêi Kuô̆k hô̆i xua tơdroăng vâ pêi cho kum ăm pơxúa dêi Tơnêi têa, hdroâng mơngế, xua hơniâp lĕm dêi kuăn pơlê.

Tiô tơdroăng Hneăng hôp má môi, Kuôk hô̆i hneăng má XV, hâi lơ 21/7 Kuô̆k hô̆i pêi cheăng a hngêi hôp kân tơpui tơno, têk kŏng môi tuăn tơbleăng ăm pêi pro mâu Pơkâ rah xo mâu kăn dêi Viƀan pơkuâ Kuô̆k hô̆i.

            A Sa Ly tơplôu ƀă tơbleăng