VOV4.Sêdang - A roh hôp mơ’no tơdrêng tung um tơvi kơxê lơ 17/6 ƀă Pơlê kong kân Hồ Chí Minh ƀă kong pơlê Bắc Giang, pôa Vũ Đức Đam, Ngế pro xiâm phŏ hnê ngăn tơnêi têa, Kăn pơkuâ Hnê mơhno tơnêi têa hbrâ mơdât pơreăng COVID 19, pơchân tối Pơlê kong kân Hồ Chí Minh pơtối thăm khăm ngăn, rĕng mơnhên mâu tíu ai pơreăng vâ mơdât ôh tá ăm lo pa kong a kơpong ki mê, mơ-eăm ôh tá ăm klâ kơtăn lâp pơlê kong kân tung pơla ton hâi ƀă ví ôh tá ăm ai tơdroăng pơkuâ ôh tá kơtăng tung kơpong mơdât ôh tá ăm lo pa kong, klâ kơtăn pơlê pơla.

Hmiân tuăn ƀă ivá khăm ngăn dêi Pơlê kong kân Hồ Chí Minh drêng hiăng châ mơdêk 30.000 test đơn/1 hâi nôkố, pôa Vũ Đức Đam pơchân Pơlê kong kân Hồ Chí Minh kal pêi pro mâu pơkâ hbrâ mơdât pơreăng, mơ-eăm mơdât, ôh tá ăm pơreăng tâ tú rơdâ tung kơpong hngêi kơmăi kơmok.

Ki ê a kong pơlê Bắc Giang hiăng ăm phêp 123 khu tê mơdró vêh pêi cheăng ƀă vâ chê 2 rơpâu ngế kŏng nhân pêi cheăng. Tiô pôa Vũ Đức Đam, kong pơlê Bắc Giang kal klâ kơpong ối dêi ngế tá hâi prêi ƀă kơpong hên hâi ôh tá ai ngế F0, ing mê, tơkŭm mâu troăng vâ tơleăng kêi đeăng a mâu tíu xiâm klâ kơtăn tơkŭm tá hâi tơniăn.

A Sa Ly tơplôu ƀă tơbleăng