VOV4.Sêdang - Roh hôp mơ’no tơdrêng tung um tơvi dêi Khu kăn ai mâ đi đo Khu hnê mơhno tơnêi têa ‘na hbrâ mơdât COVID 19 ƀă khu râ kăn pơkuâ Pơlê kong kân Hồ Chí Minh, pôa Vũ Đức Đam, Ngế pro xiâm phŏ hnê ngăn tơnêi têa, Kăn pơkuâ hnê mơhno tối rơdêi: Pơlê kong kân Hồ Chí Minh kal xúa tŭm hâi khế pêi pro klâ kơtăn pơlê pơla tiô Pơkâ 16 dêi Ngế pro xiâm hnê ngăn Chin phuh ƀă tơdroăng kơbố ối alâi mê ối tơniăn môi tíu amê vâ mơdât pơreăng.

Tơdroăng kố a roh hôp, pôa Nguyễn Thành Phong, Kăn hnê ngăn Vi ƀan Pơlê kong kân Hồ Chí Minh tối ăm ‘nâi: nôkố pơlê kong kân kố dế thâ hbrâ mâu troăng hbrâ rơnáu ăm tơdroăng pêi pro klâ kơtăn pơlê pơla pơlê kong kân tung pơla 15 hâi, pơxiâm sap kơmăng dế hâi lơ 9/7, rak tơniăn tơdroăng rêh ối dêi kuăn pơlê, ôh tá pơ’lêh hmâng vâ ƀă tơdjâk.

Xông tơpui a roh hôp, pôa Vũ Đức Đam pơkâ: klâ kơtăn thế tiô tơdroăng mơdêk tâ mê nếo môi kơlo, xúa mâu hâi klâ kơtăn tiô Pơkâ 16 dêi Ngế pro xiâm hnê ngăn Chin phuh vâ mơdât pơreăng.

A Sa Ly tơplôu ƀă tơbleăng