VOV4.Sêdang - "Pơlê kong kân Hồ chí Minh nếo pêi pro kơtăng mâu tơdroăng hbrâ mơdât pơreăng, ki ê pơlê kong kân xuân kal mơdêk hnê tối, mơhnhôk kuăn pơlê hlê tơdroăng pá mơhnhôk kum dêi rơpó mơ-eăm tơkâ luâ xơpá tung tơdroăng hbrâ mơdât pơreăng”.  Kố cho tơdroăng pơkâ thế dêi pôa Vũ Đức Đam, Ngế pro xiâm phŏ hnê ngăn tơnêi têa, Ngế pơkuâ Hnê mơhno cheăng Tơnei têa ‘na hbrâ mơdât pơreăng COVID-19 a rôh hôp mơ’no tơdrêng tung um tơvi tơpui ƀă mâu kăn pơkuâ Pơlê kong kân Hồ Chí Minh a kơxê lơ 14/7 a tíu pêi cheăng Chin phuh.

Pơla nôkố, pơlê kong kân hiăng kum lối 130 rơpâu ngế ki pêi cheăng ôh tá môi tíu, ƀă dâng 9 rơpâu ngế tê vế kơxô̆, châ 57% tiô pơkâ, ai pơlê krâm châ 90% kum ăm mâu ki xơpá, mâu ngế ki tê mơdró tung pơlê kong kân. Ngế pro xiâm phŏ hnê ngăn tơnêi têa tối pơchân pơlê kong kân thế pơtối tơmâng khât troh mâu ki rêh ối xơpá, malối a mâu kơpong, tíu kuăn pơlê ối tơkŭm hên ki ai hên mâu ngế kơtiê klêi kơ’nâi pơkâ klâ krê, pakĭng tơdroăng tŏng kum tơmeăm kế kâ, phái mâu tơdroăng kal xúa rêm hâi mê kuăn pơlê ối kal kum ‘na mơhno túa lĕm tro, hơlêm tuăn ngôa vâ kơdroh ki hâ ho pro ăm lĕm hyôh kong prâi tung pơla klâ ối kơtăn.

Gương tơplôu ƀă tơbleăng