VOV4.Sêdang - Kơxê lơ 8/7, Khu xiâm ngăn troăng prôk ƀă rơxế kơtâu ai hlá mơéa pơtroh ăm Vi ƀan hnê ngăn kong pơlê Lâm Đồng, Khu xiâm ngăn tơƀai Việt Nam ƀă Khu xiâm ngăn troăng prôk ƀă rơxế kơtâu ‘na tơdroăng ki pơtê pơtân mâu rôh kơneăng sap ing Pơlê kong kân Hồ Chí Minh troh a Lâm Đồng ƀă sap ing Lâm Đồng ngi Pơlê kong kân Hồ Chí Minh. Hlo ôh tá tơniăn dêi pơreăng kân Covid-19, mâu ngế ki dương tĭnh ƀă SARS-CoV-2 a Lâm Đồng pơrá ai troăng tâ tú xua ing mâu ngế ki lo ing ƀă vêh ing Pơlê kong kân Hồ Chí MInh, Vi ƀan hnê ngăn kong pơlê Lâm Đồng hiăng pơkâ thế mâu kơ koan ki ai tơdjâk pơtê pơtân mâu rôh pơto chơ tơmối ing troăng saping Pơlê kong kân Hồ Chí Minh troh Lâm Đồng ƀă sap ing Lâm Đồng ngi Pơlê kong kân Hồ Chí Minh. Tung pơla mê, troăng tơƀai ôh tá kơneăng prôk vêh pơla 2 kong pơlê kố xuân ối kơneăng ƀă tơdroăng pơkâ 5 rôh tung môi măng tĭng, pro tơdjâk ƀă pro pá kân troh tơdroăng cheăng hbrâ mơdât pơreăng COVID-19. Xua mê, Khu xiâm ngăn troăng prôk ƀă rơxế kơtâu  hiăng môi tuăn pơkâ tơdroăng ki pơtê pơtân mâu rôh kơneăng chơ tơmối sap ing Pơlê kong kân Hồ Chí Minh troh Lâm Đồng ƀă sap ing Lâm Đồng ngi Pơlê kong kân Hồ Chí Minh tiô pơkâ thế dêi Vi ƀan hnê ngăn kong pơlê Lâm Đồng. Hâi chôu xúa cho sap ing 12 chôu măng dế hâi lơ 9/7.

Nga tơplôu ƀă tơbleăng