VOV4.Sêdang - Kơxo lơ 17/6, Hô̆i đong kong pơlê Gia Lai hneăng má XI tơkŭm po hneăng hôp má 21 (tơdroăng hriăn plĕng). A hneăng hôp roh kố, Hô̆i đong kong pơlê Gia Lai séa ngăn, pơkâ troăng hơlâ mơ’no liăn 83 tơdroăng tơkêa bro xua Vi ƀan kong pơlê tơbleăng. Kố cho mâu tơdroăng tơkêa bro cho kal, mâu tơdroăng tơkêa bro ko cho tơdroăng ki vâ mơdêi, tơdroăng ki xiâm, kal khât vâ mơjiâng pro hngêi trăng, troăng klông dêi kong pơlê, hên tơdroăng tơkêa bro ai tơdjâk kân troh tơdroăng mơnhông mơdêk cheăng kâ – rêh ối pơlê pơla dêi kong pơlê tung hneăng hơnăm 2021 – 2025 ƀă mâu hơnăm pơtối mê.

Xông tơpui a roh pơxiâm po, Kăn hnê ngăn Hô̆i đông kong pơlê Gia Lai pơkâ thế mâu kăn teăng mâ Hô̆i đong kong pơlê, mâu kăn teăng mâ veăng séa ngăn tiô tơdroăng pơkuâ dêi hnoăng cheăng, pôu râng hnoăng cheăng, tơdrăng, ôh tá tơdjâk pa kong tung tơpui tơno, tơkŭm tung mâu tơdroăng ki xiâm, ki kal ƀă rêm tơdroăng cheăng xiâm, vâ Hô̆i đong kong pơlê mơnhên mâu troăng hơlâ, pơkâ tro, mơnhông ki châ tơƀrê kơxô̆ liăn dêi pơkâ mơ’no liăn iâ khế dêi hneăng hơnăm 2021 – 2025 xua tơdroăng mơnhông mơdêk dêi kong pơlê’’.

A Sa Ly tơplôu ƀă tơbleăng