VOV4.Sêdang - Tung péa hơnăm 2020 -2021, kong pơlê Dak Lak tơkâ luâ péá hdroh tâ tú pơreăng mê cho: pơreăng COVID-19 ƀă hên tơring, cheăm hlo ai pơreăng êi rơtốu krôk ki rơ-iêo. Rơtế ƀă mâu ƀok thái pơkeăng, kăn ƀô̆ ngăn pơkeăng ƀă mâu khu ki ai tơdjâk, khu chêh hlá tơbeăng dêi hên kơ koan chêh hlá tơbeăng a kong pơlê ôh tá xâu ƀă tơdroăng ki xơpá, tơbrêi tơbrêh, xâu xía, lăm troh a tíu ki ai pơreăng, tơbleăng rĕng, tơdrêng mâu tơdroăng ki ôh tá tơniăn dêi pơreăng ƀă ivá mơ-eăm hbrâ mơdât.

Tơdroăng ki khên tơnôu, lĕm tro tung kơxô̆ ngế chêh hlá tơbeăng ki lăm troh a tíu ki ai pơreăng mê cho mâu ngế chêh hlá tơbeăng cho vâi kơdrâi. Ƀă tơdroăng ki khên tơnôu, hbrâ kơchăng, ƀă rơkê, mâu kơpâu reăng ki lĕm dêi mâu kơ koan chêh hlá tơbeăng hiăng kum pro kơdroh tơdroăng ki hơkăng, xâu rơ-iô a tíu ki ai pơreăng. Drêng tơbâ 96 hơnăm Hâi Hlá tơbeăng kăch măng Việt Nam, pó vâi krâ nhŏng o ƀă pú hmâ hmâng ƀai “Mâu ngế ki chêh hlá tơbeăng a tíu ki hbrâ mơdât pơreăng”.

Hơnăm 2020 – 2021, khu chêh hlá tơbeăng Nam Trang (VOV Tây Nguyên), Kim Oanh, Hoàng Tuyết (Hlá tơbeăng Dak Lak), Hải Yến (Rơ’jíu – um tơvi Dak Lak (DRT) phiu ro ƀă dêi pó khu chêh hlá tơbeăng xua đi đo rơtế dêi pó lăm chêh tơdroăng tung mâu tíu xiâm ai pơreăng xông tâ tú rơ-iô môi tiah pơreăng êi rơtốu krôk ƀă COVID 19. Mơngế kơdrâi troăng hơngế há, vâi rơtế ƀă khu cheăng pá puât drêng kơmăng, sâp ếo mơdât pơreăng xi klâp, tung dế mâu kơchơ ki apoăng xiâm, mâu tơraih rơxế, lơ mâu kơpong klâ kơtăn, vâ ‘nâi mâu tơdroăng rĕng má môi ‘na tơdroăng pơreăng. Vâi xuân “drêng ôh tá ăm vâi ‘nâi, drêng ăm vâi hlo”, drêng ối a tíu mơdât pơreăng COVID19 tíu tơkăng kong, drêng a môi to cheăm kơpong hơngế hơngo tíu pơreăng êi krôk xông tâ tú.

Mâu ngế kơdrâi chêh hlá tơbeăng đi đo lăm chêh tơdroăng a mâu tíu ai pơreăng

Séa ngăn khu pú ing mâu ƀai chêh nếo tơbleăng tung măng Internet ƀă tơdroăng lăm chêh tơbleăng tung măng pơlê pơla, tối dêi mâu chô phut tơbrêi tơbrêh pá puât ƀă mâu roh phiu ro – loi tơngah dêi tơná, tơmâng khu pú tơpui mơ’no tơdrêng tung um tơvi tơdế kơpong mơdât ôh tá ăm lo pa kong, ngế chêh hlá tơbeăng Nguyễn Thảo (VOV a Gia Lai) rơrêk tung hiâm mơno:

“Akố, á ƀă hên khu pú xuân hâk vâ ƀă tơdroăng cheăng, laga xuân ía ‘nâng khu nâ Trang a Dak Lak châm. Kơmăng mê mâu nâ xuân lăm prôk chêh a kơpong mơdât ôh tá ăm lo pakong, tíu ki kơbố xuân xâu tro tâ COVID 19 ƀă tro mơdât ôh tá ăm lo pakong’’.

Châ tơƀrê mâu kơmăng lo lăm pêi cheăng dêi 4 ngế kơdrâi chêh hlá tơbeăng, ôh tá xê to hrĭng tơdroăng nếo ai ‘na tơdroăng pơreăng, ‘na mâu tơdroăng mơ-eăm dêi kơvâ khăm pơlât rơtế ƀă mâu kơ koan cheăng, mê ối hên ƀai chêh rơrêk tung hiâm mơno mơngế ‘na mâu tơdroăng tŏng kum dêi pó, tơdroăng veăng kum dêi mâu khu tê mơdró, mâu khu râ kuăn pơlê, rơtế dêi pó tơkâ hluâ mâu hâi pá puât. ‘Na tơdroăng ki ôh tá mơhúa, tơbrêi tơbrêh klêi kơ’nâi rêm tơdroăng kal, ƀai chêh ‘na pơreăng, ngế chêh hlá tơbeăng Kim Oanh – hlá tơbeăng Dak Lak tó phiu ro:

“Peăng hlá tơbeăng Dak Lak mê ai o Hoàng Tuyết chêh ‘na tơdroăng khăm pơlât. Mâu tơdroăng nếo ai, ƀai ‘na pơreăng êi rơtốu krôk môi tiah ngin o chêh, laga thế xo hên inâi ngế lăm chêh, xua tâng xo inâi tơná hên ‘nâng mê nhŏng o kô thăm tô tuăn xua lăm pêi cheăng a kơpong ai pơreăng hên ‘nâng. \

Châ khât cho tơbrêi tơbrêh, laga xuân hbrâ ví châ hên xua đi đo pêi tiô pơkâ hbrâ mơdât pơreăng kơtăng má môi, châ sâp ếo mơdât pơreăng môi tiah mâu ƀok thái pơkeăng ƀă mâu ngế pêi cheăng tung kơpong ai pơreăng’’.

Mâu ngế kơdrâi séa ngăn tơdroăng vâ teăm chêh tơdrêng tơdroăng

Ƀok thái pơkeăng Nay Phi La, Kăn pơkuâ Khu pơkuâ ngăn pơkeăng ƀă khăm pơlât, Kăn phŏ pơkuâ Khu hnê mơhno hbrâ mơdât pơreăng COVID 19 kong pơlê Dak Lak tối ăm ‘nâi, tung tơdroăng hbrâ mơdât pơreăng cho hên tơdroăng pá puât, pôa ƀă khu pú tâ châ hơlêm ing mâu ngế chêh hlá tơbeăng ƀă kơdrâm kuăn pơlê, ki má lối cho mâu ngế kơdrâi chêh hlá tơbeăng đi đo rơtế môi tiah Kim Oanh, Hoàng Tuyết, Hải Yến, Nam Trang.

Pôa Nay Phi La rơrêk tung hiâm mơno:

“Tơdroăng kăn ƀô̆ khăm pơlât troh kơpong pơreăng ki lâi xuân ai mâu ngế chêh hlá tơbeăng rơtế prôk, xua mê ngin tâ ôh tá xê prôk môi ngế xêh. Mâu ngế chêh hlá tơbeăng mơ-eăm ‘nâng, tơkôm vâ mơnhên mâu tơdroăng ăm tơtro, xuân pro ăm mâu khu cheăng khăm pơlât ƀă mâu ngế pêi cheăng a hngêi pơkeăng châ mơhnhôk phiu ro tung hiâm mơno”.

Khu pŭn ngế Nam Trang, Kim Oanh, Hoàng Tuyết, Hải Yến cho mâu ngế nôu dế ai kuăn ối kŭn. Prôk troh mâu tíu ai pơreăng xuân tô tuăn há. Laga, xuân môi tiah hên ngế chêh hlá tơbeăng, vâi plĕng nhên tơná cho kơxái tơdjêp tơdroăng, ai hnoăng ƀă tơdroăng pơlê pơla. Pơreăng rế rơ-iô, mâu ngế chêh hlá tơbeăng chêh ‘na tơdroăng khăm pơlât thế rế prôk troh mâu tíu ki mê vâ ai tơdroăng teăm tơdrêng, tơtro khât.

Nam Trang, ngế chêh hlá tơbeăng, Rơ’jíu Việt Nam kơpong Tây Nguyên tối:

“Á ai tối ƀă Oanh, Tuyết ƀă mâu khu pú: Tâng ôh pin pâ kong pơlê môi kơbong krê vâ ối amê, ôh tá vêh a hngêi, ôh tá lo a tíu ôu kâ, xuân ôh tá troh a kơ koan? Kơ-êng tiah mê tê, laga ngin pơrá ‘nâi, mâu tơmeăm khoăng – kơbong a kong pơlê tâi tâng hiăng ‘măn ăm tơdroăng klâ kơtăn, mơdât pơreăng COVID 19. Tơdroăng hbrâ mơdât pơreăng kô ối ton. Tâi tâng khu, ngế ki lâi xuân ai kuăn ối kŭn, ôh tá chiâng lôi amê ối xêh môi ngế môi tíu ôh.

Xua mê, ngin xuân ối mot a mâu tíu ai pơreăng môi tiah mâu kăn ƀô̆ khăm pơlât, pêi pro mâu pơkâ tơniăn – rak ngăn dêi châ tơná môi tiah kăn ƀô̆ khăm pơlât xuân pêi. Peăng ƀok thái pơkeăng xuân ăm ki pâng rơkong môh, hmân ếo mơdât pơreăng xúa 1 xôh, pro tơ’lêi hlâu má môi vâ ngế chêh hlá tơbeăng chêh tơdroăng, xua mê xuân hmiân tuăn. Pói tơngah kô rĕng tâi pơreăng”.

Mơhé tối ai mâu tơdroăng tô tuăn, laga tâi tâng khu xuân phiu ro. Plâ 3 khế hiăng hluâ, vâi xuân tối dêi tơdroăng tô tuăn ƀă phiu ro tiah mê. Pơreăng COVID 19 Dak Lak hiăng hluâ 21 hâi ôh tá ai ngế nếo tro tâ pơreăng, pơreăng êi rơtốu krôk hiăng châ mơdât, Nam Trang – Kim Oanh hiăng chiâng vâ chêh hên tâ mê ‘na ôm hyô – pơlê kong kơdrâm Ƀuôn Ma Thuột; Hải Yến mơdoh hên chôu chêh ‘na khu mô đô̆i – Kŏng an.

Khu chêh hlá tơbeăng pơ’lâng dêi pó tung tơdroăng ki tó phiu ro. Vâi tối tơkôm tâi pơreăng kô châ trâm lâm pâng rơkong môh, xup mâu um ki lĕm dêi ngế kơdrâi, vâ vêh pâ dêi rơxông nếo dêi tơná. Vâi tối tiah mê, kơbố xuân hlo, vâi dế mâu hâi khế rơxông ối nếo má môi dêi tơdroăng rêh ối, tơkâ hluâ pơloăng mơnúa ƀă tơdroăng ki ó rơdêi, tơngah khât dêi tơná, rŭm môi tuăn ƀă loi tơngah.

VOV Tây Nguyên

A Sa Ly tơplôu ƀă tơbleăng