VOV4.Sêdang - A Hà Nôị dế po roh hôp má môi, Kuô̆k hô̆i hneăng XV. Hneăng hôp roh kố cho kal kân khât, po troăng ahdrối ăm tơdroăng cheăng Kuô̆k hô̆i hneăng 15 drêng pơxiâm tâ phĭu, rah pôk khu kăn xiâm, vâ kĭ tâk tăm pŏng mơnhên tŭm têk, tâi tâng inâi mâu ngế ki pro kăn xiâm dêi kơ koan Tơnêi têa ƀă pơkâ mâu tơdroăng pêi cheăng kâ, rêh ối pơlê pơla, liăn ngân, tơdroăng rak kơdĭng, mơ’no hrê liăn ngân mơjiâng pro mâu tơmeăm khoăng tơchoâm, tơdroăng cheăng xiâm dêi tơnêi têa, vâ mơjiâng chiâng mâu kơvâ cheăng tung rak vế, pêi pro tung plâ 5 hơnăm la ngiâ.

Hnoăng cheăng tơrŭm, mâu ngế cheăng ăm khu kăn xiâm dêi Tơnêi têa cho tơdroăng ki kal dêi hneăng hôp ki apoăng tung hnoăng cheăng Kuô̆k hô̆i hneăng má 15. Tiô pơkâ dêi Luât hơnăm 2013, klêi kơ’nâi châ Kuô̆k hô̆i pôk, Kăn xiâm hnê ngăn Kuô̆k hô̆i, kăn hnê xiâm hnê ngăn tơnêi têa, Ngế pro xiâm hnê ngăn Chin phuh, kăn cheăng tung Hngêi tơleăng xiâm kô leh krâ kơlŏng to pro kăn a ngiâ Kuô̆k hô̆i. Tâi tâng ai 50 ngế kăn pơkuâ dêi mâu kơ koan Tơnêi têa châ Kuô̆k hô̆i pôk, kĭ rah xo a rôh hôp kố. Krê Chin phuh, tung hneăng ki kố ai 4 Ngế pro xiâm phŏ hnê ngăn tơnêi têa.

Kăn xiâm pơkuâ hnoăng cheăng khu kăn Kuô̆k hô̆i Nguyễn Thị Thanh ăm ‘nâi, mâu inâi hiăng châ tơbleăng ăm Khu pơkuâ ngăn Tíu xiâm Tơnêi têa ƀă Khu xiâm pơkuâ tơdroăng kal kí hiăng tơbleăng ing mâu tơdroăng tơkêa tơdjâk troh inâi dêi Kuô̆k hô̆i ƀă tơdroăng tơkêa pơkâ Chin phuh:

“Khu tơrŭm pơkuâ kơ koan tơnêi têa, tơdroăng pơkâ dêi Chin phuh kô séa ngăn 27 ngế mê cho: Ngế pro xiâm hnê ngăn, 4 Ngế pro xiâm phŏ hnê ngăn tơnêi têa ƀă 18 ngế xiâm pơkuâ, 4 ngế kăn pơkuâ kơ koan ki tơdâng tơnêi têa. Tơdroăng pơkâ hiăng châ mơnhên, séa ngăn nhên tung tơdroăng ki mơnhên tối mơgêi hneăng cheăng dêi Chin phuh hneăng hơnăm 2016 – 2021 ƀă tung tơdroăng ki séa ngăn nhên tâi tâng ‘na hnoăng cheăng kăn ƀô̆”.

Pơxiâm po Rôh hôp má môi, Kuô̆k hô̆i hneăng má VX

Tơdroăng ki séa ngăn khu pơkuâ kơ koan Tơnêi têa ôh tá chiâng hrá. Tơdroăng kố pâ thế hnoăng cheăng râng tơdroăng cheăng cho ki xiâm dêi rêm ngế kăn tung rêm tơdroăng ki xiâm dêi rôh hôp, malối cho tung tơdroăng ki pôk, kĭ, séa ngăn 50 ngế inâi kăn pơkuâ dêi mâu kơ koan Tơnêi têa. Pôa Phạm Văn Hòa, kăn lo ing Đồng Tháp ăm ‘nâi:

“Hnoăng cheăng dêi rêm ngế kăn cho kal tơkŭm, kơhnâ vâ mơhno tối hiâm mơno loi tơngah, pôk dêi kuăn pơlê tung rôh hôp. Ki hdrối tâ cho athế pôk xo châ 50 ngế pơkuâ xiâm. Kăn xiâm hnê ngăn Kuô̆k hô̆i, mâu kăn xiâm phŏ hnê ngăn tơnêi têa, mâu ngế cheăng; Kăn xiâm hnê ngăn tơnêi têa, kăn xiâm phŏ hnê ngăn tơnêi têa; Chin phuh, Ngế pro xiâm hnê ngăn tơnêi têa; mâu ngế cheăng tung Chin phuh; Viê̆n séa ngăn arak luât; kăn pơkuâ hngêi tơleăng; kăn xiâm mơjiâng pro liăn tơnêi têa ƀă hên ki ê. Á khĕn kố cho hnoăng cheăng ki kal”.

Rơtế ƀă hnoăng cheăng mâu ngế cheăng, Kuô̆k hô̆i kô pơkâ mâu tơdroăng ‘na cheăng kâ rêh ối – pơlê pơla, liăn ngân tơnêi têa 6 khế hdrối nah ƀă túa pơkâ, troăng hơlâ ăm 6 khế mơ’nui hơnăm, malối cho tơdroăng tá hneăng cheăng hneăng 15. Mê cho tơdroăng ki ‘na mơnhông mơdêk cheăng kâ rêh ối pơlê pơla, ‘na ‘no liăn cheăng tơdjuôm, ‘na liăn ngân, malối cho chĕn liăn tơdjuôm ƀă mâu tơdroăng ki ai tơdjâk troh kơvâ liăn ngân hneăng hơnăm 2021 – 2025. Kố cho mâu tơdroăng ki kal, pro chiâng tơdroăng pêi pro “pơkâ pêi péa tơdroăng” rế hbrâ mơdât pơreăng rế mơnhông mơdêk cheăng kâ rêh ối pơlê pơla, ối tung hnoăng pơkuâ dêi Kuô̆k hô̆i tiô luât pơkâ.

Pôa Bùi Văn Cường, ngế xiâm chêh tôm xo rơkong, kăn pơkuâ Ƀơrô cheăng Kuô̆k hô̆i mơnhên:

“Tâng Kuô̆k hô̆i ôh tá pơkâ tơdroăng 5 hơnăm ‘na cheăng kâ rêh ối pơlê pơla kô xơpá ăm Chin phuh tung tơdroăng ki tơbleăng pơkuâ nhên. Kố cho tơdroăng pơkâ Hneăng hôp 13 dêi Đảng. Kuô̆k hô̆i cho kơ koan xiâm tơnêi têa kân má môi, athế châ tơbleăng mâu troăng hơlâ ‘na mơnhông mơdêk cheăng kâ rêh ối pơlê pơla. Tâng Kuô̆k hô̆i hrá tơbleăng mê ‘na tơdroăng ki ‘no liăn cheăng kô xơpá, rế hrá mê rế pro ăm tơdroăng mơdêk mơnhông rế hrá tâ”.

Pôa Vương Đình Huệ, kăn xiâm hnê ngăn Kuô̆k hô̆i tơpui a rôh pơxiâm po hneăng hôp

Maluâ dế tro tơdjâk dêi pơreăng COVID-19 ƀă tơdroăng ki ôh tá tơniăn, ôh ti ‘nâi hdrối, la tung tơdroăng pơkâ rêh ối pơlê, Chin phuh xuân kal pơtối mơ-eăm pêi pro “péa tơdroăng” vâ tơdroăng cheăng kâ vêh mơdêk nếo. Chin phuh môi tuăn pơtroh ăm Kuô̆k hô̆i tá hâi ‘mâi rơnêu tơdroăng pơkâ, tơdroăng mơnhông cheăng kâ rêh ối pơlê pơla hơnăm 2021 hiăng pơkâ mơ’no cho GDP tâk sap ing 6-6,5%.

Pôa Nguyễn Minh Sơn, kăn phŏ pơkuâ Vi ƀan cheăng kâ dêi Kuô̆k hô̆i tối leăng:

“Ôh tá ‘mâi rơnêu tơdroăng pơkâ ‘na mơdêk. Xua ối séa ngăn tung tơdroăng Pơkâ 124 dêi Kuô̆k hô̆i vâ pêi pro tơdâng tơ’mô mâu rôh, troăng hơlâ ki Kuô̆k hô̆i hneăng má 14 hiăng pơcháu ăm Chin phuh. A rôh ki mê nah Kuô̆k hô̆i mơnhên tối tâi tâng ƀă ôh tá ‘nâi hdrối mâu kơvâ cheăng ki lâi tơdjâk dêi pơreăng kân COVID-19 troh tơdroăng cheăng kâ ƀă xuân hiăng pơkâ mơ’no vâ meăm khât tung la ngiâ vâ pêi pro mâu tơdroăng pơkâ mơ’no”.

Vâ rak tơniăn ƀlêi chiâng rôh hôp má Môi, mâu kơ koan dêi Kuô̆k hô̆i, Chin phuh, mâu kơ koan mơjiâng luât hiăng tơrŭm pêi pro châ rơhéa môi tuăn ƀă mâu tơdroăng pơkâ vâ pơtro ăm Kuô̆k hô̆i. Tung pơla ai pơreăng COVID-19 ôh tá tơniăn, Kuô̆k hô̆i hiăng tơbleăng Khu xiâm pơkuâ tơdroăng kal kí ƀă hôp tơkŭm a ƀơrô hôp Diên Hồng ƀă tơdroăng kơdĭng má môi chôu phut ƀă châ rơhéa má môi, tơniăn má môi.

Tơdroăng Rôh hôp kố hiăng châ pro 5 hâi tâng vâ pơchông ƀă tơdroăng ki tối hdrối mê, pêi cheăng tá tung hâi pơtê. Mâu kăn Kuô̆k lo ing 19 to kong pơlê ki ai pơreăng hiăng châ tơdah krê, ối a hngêi ki ăm tơmối kâ koi, ối pơtê ƀă ‘nân hôp krê môi kơpong tung tíu hôp Diên Hồng.

Pôa Bùi Văn Cường, ngế xiâm chêh tôm xo rơkong Ƀơrô cheăng Kuô̆k hô̆i ăm ‘nâi tơ’nôm:

“’Na hnoăng cheăng pơkâ, ngế ki ối a mâu kong pơlê pêi pro klâ krê pơlê pơla tiô pơkâ 16 drêng vêh ing Hà Nội, tâng cho kŏng nhân mê athế klâ krê, la Ngế pro xiâm hnê ngăn Chin phuh hiăng pơkâ ƀă mâu kăn Kuô̆k hô̆i hiăng séa ngăn 3 rôh âm tĭnh, hiăng pâk vaccine mê châ veăng hôp a rôh hôp. Laga, xuân athế pêi pro kơtăng mâu tơdroăng pơkâ ‘na hbrâ mơdât pơreăng COVID-19. Nôkố ngin ai túa pơkâ krê vâ klâ krê, la xuân veăng tung mâu rôh hôp ƀă tâ phĭu môi tiah hmâ”.

Kuăn pơlê tung lâp tơnêi têa dế séa ngăn ƀă loi tơngah tiah kố, Rôh hôp má môi, Kuô̆k hô̆i hneăng má 15 châ po tơniăn, ƀlêi chiâng. Kố cho rôh hôp ki kal, tâng pêi pro tro ƀă rơkê plĕng kô veăng kum mơdêk mơnhông cheăng ka rêh ối pơlê pơla tơnêi têa, malối cho pêi pro “pơkâ pêi péa tơdroăng”, rế mơnhông mơdêk cheăng kâ, rế hbrâ mơdât pơreăng COVID-19 châ tơƀrê.

VOV

Katarina Nga tơplôu ƀă tơbleăng