VOV4.Sêdang - Hâi lơ 20/7, rôh hôp má môi, Kuô̆k hô̆i hneăng 15 pơxiâm po a hngêi Kuô̆k hô̆i. Tung lối 11 hâi pêi cheăng, Kuô̆k hô̆i ‘măn ăm 3 hâi tơpui tơdroăng ‘na mơngế pêi cheăng drêng vâ tâ phiu, kĭ pơkâ ‘mâi xing xoăng mơngế cheăng tiô pơkâ kăn xiâm dêi mâu kơ koan Tơnêi têa, tung mê, ai Kăn xiâm hnê ngăn tơnêi têa, Ngế pro xiâm hnê ngăn Chin phuh ƀă Kăn xiâm hnê ngăn Kuô̆k hô̆i, séa ngăn, tơpui tơno tối tơbleăng mâu tơdroăng ‘na cheăng kâ-rêh ối ƀă pơkâ mâu tơdroăng kal ki ê.

Rôh hôp má môi, tâ phĭu rah xo kăn Kuô̆k hô̆i hneăng XV

Tiô tơdroăng,  kơxo klêi Kăn xiâm hnê ngăn Kuô̆k hô̆i hneăng 14 pôa Vương Đình Huệ tối tơbleăng pơxiâm po hneăng hôp, pôa Nguyễn Phú Trọng, Kăn xiâm pơkuâ hnê ngăn Đảng kô ai ƀai pơchuât ki kal. Klêi mê, Kuô̆k hô̆i hôp krê vâ séa ngăn tơdroăng cheăng ‘na mơngế, tơbleăng pơkâ ‘na Kăn xiâm phŏ hnê ngăn Kuô̆k hô̆i, mâu ngế cheăng tung Vi ƀan pơkuâ cheăng Kuô̆k hô̆i  hneăng ki nếo. Kơxê, mâu kăn kô tâ phĭu kí rah xo Kăn xiâm hnê ngăn Kuô̆k hô̆i.

Tiô pơkâ, Ngế ki nếo châ rah xo pro Kăn xiâm hnê ngăn Kuô̆k hô̆i  thế môi tuăn ƀă Tơnêi têa, ƀă kuăn pơlê, ƀă Luât tơnêi têa pơkâ. Klêi mê, Kuô̆k hô̆i kô pêi tơdroăng cheăng tâ phĭu rah xo 4 ngế kăn phŏ hnê ngăn Kuô̆k hô̆i ƀă 12 ngế cheăng tung Vi ƀan pơkuâ Kuô̆k hô̆i .

Gương tơplôu ƀă tơbleăng