VOV4.Sêdang - Kơxê lơ 15/6, tung rôh po Hneăng hôp ‘no tơdrêng ing um tơvi kăn xiâm pơkuâ ngăn lêng mâu kong têa ASEAN rôh má 15 (ADMM-15) hiăng po rôh hôp ki ôh tá khât pơla mâu kăn xiâm pơkuâ ngăn lêng ASEAN – Sinuâ. Pôa Phan Văn Giang, kăn pơkuâ Việt Nam - Thươ̆ng tươ̆ng, Ngế xiâm pơkuâ ngăn lêng tơnêi têa pin veăng hôp a hneăng hôp kố. Tơpui a rôh po hôp, Thươ̆ng tươ̆ng Phan Văn Giang mơnhên tối khât hnoăng cheăng dêi Sinuâ ƀă tơrŭm cheăng lêng – gak kring pơla ASEAN – Sinuâ tung pơla hdrối kố nah, malối cho tung rôh po hôp khu kăn xiâm pơkuâ ngăn lêng ASEAN po rơdâ (ADMM+) ƀă Hneăng hôp kơpong ASEAN.

Rôh trâm ki ôh tá khât pơla kăn xiâm pơkuâ ngăn lêng ASEAN – Sinuâ

‘Na tơdroăng Biển Đông, pôa Phan Văn Giang pơkâ thế rêm pâ kal pêi pro mâu tơdroăng ki tơ’lêi hlâu ăm tơdroăng ki tơpui tơno Khu xiâm pơkuâ ngăn lêng tiô pơkâ tơpui ‘na Biển Đông (COC), malối cho ing mâu tơdroăng ki mơjiâng hiâm mơno loi tơngah, kơdroh mâu tơdroăng pêi pro ôh tá ‘ló, ví tơdroăng ki pêi pro ôh tá tơniăn, pơkâ tơleăng tơdroăng ki tơxup tơbriât tiô troăng ki hơniâp lĕm, ngăn tung tơdroăng luât pơkâ kong têa, tung mê, ai Tơkêa Khu lâp kong têa ‘na Luât Têa kơxĭ hơnăm 1982.

Katarina Nga tơplôu ƀă tơbleăng