VOV4.Sêdang - Tơdroăng rơngê môi tiah rơpui tơno, la pơtối châ chôu vế khât, tơdrá ki ôh tá la lâi chiâng lôi tung tơdroăng rêh kâ ối dêi hdroâng M’nông. Vâ pơtối rak vế khôi túa,vêa vong dêi hdroâng kuăn ngo, mơngế M’nông a ƀon Pi Nao, cheăm Nhân Đạo, tơring Dak Rlâp kơdo mơ-eăm hnê mơhno, pơtối rak vế mâu tơdrá dêi hdroâng kuăn ngo ăm mâu khu rơxông kuăn cháu.

Maluâ ối a hngêi lơ a chiâk deăng, tung hngêi mơhno túa lĕm tro pơlê pơla, a kơnoh on lơ a mâu mâu hâi leh mơdĭng mê, mâu tơdrá rơngê, ting ting hiăng hmâ tung hiâm mơno ƀă tơdroăng rêh ối dêi mơngế M’nông a ƀon Pi Nao, đi đo châ chuât xơtó ƀă rơ-eăng ro. Rơngê M’nông sap ing chal vâi krâ roh ton nah hiăng mot tung tuăn tơmiât, hiâm mơno dêi kuăn pơlê akố. Mâu rơkong rơngê dêi mâu vâi jâ, mâu vâi nôu, mâu pôa ƀă mâu tơdrá ki rơ-eăng tơniâ, hơniâp ro hiăng châ tâng, châ mơnhên rêm hâi, hên tuá, gok gâ tung rêh kâ ối, thăm pro ăm tơdroăng mơhno túa lĕm tro dêi mơngế M’nông.

Sap ing ối tơxĭn nah, mơngế M’nông a ƀon Pi Nao ngăn tơdroăng rơngê ting ting cho tơmeăm khoăng ki pơchĕm, păn roăng tuăn mơno, ôh tá păng lôi. Nâ Thị Tĕch, ối a ƀon Pi Nao, cheăm Nhân Đạo, tơring Dak Rlâp ai tối: “Roh ton nah mâu vâi pôa, vâi jâ hmâ rơngê êng tiâ dêi pó, maluâ, tung mâu hâi mơdĭng vâi rơtế rơngê, êng tiâ dêi pó, hơniâp ro ‘nâng. Klêi kơ’nâi ing tơdroăng rơngê dêi M’nông mê, á xuân hiăng châ hriâm hên mâu tơdroăng tung rêh kâ ối. Tơná á ƀă hên khu rơxông nếo tung pơlê xuân pói  rơhêng vâ châ hriâm mâu tơdroăng rơngê, ting ting dêi M’nông. Xua ti mê, drêng po mâu lâm hriâm rơngê ting ting kố, á xuân hiăng lăm chêh dêi inâi vâ mơhriâm”.

Ƀă tơdroăng ki hâk git vâ dêi tơná, pôa Y Tư a ƀon Pi Nao, cheăm Nhân Đạo tí xê to hmâ rơngê ting ting mê ối rơtế ƀă pơlê cheăm, pơtối rak vế, chôu ‘măn, hnê tơdjâ tơdrá rơngê ting ting M’nông tiô khôi hmâ chal vâi krâ roh nah. Pôa kơhnâ khât tung mâu hneăng po lâm hnê ăm khu rơxông nếo, pôa kơhnâ mơ-eăm khât tung tơdroăng hnê ăm khu vâi hnŭm, vâi rơxông nếo tung pơlê rêm nâl, rêm kơ’noăng chư, rêm tơdrá rơngê, ing mâu tơdroăng ki tơxĭn troh a mâu tơdroăng ki kân, ki pá. Lâm hriâm rơngê ting ting mê ga ai hnê ăm tơrêm khu vâi krâ, vâi hnŭm, vâi rơxông nếo. Tơdroăng hâk git rơtế ƀă tơdroăng hnê tối, mơhno djâ kơhnâ khât dêi pôa Y Tư, hên ngế tung pơlê ing roh ki ôh tá hâi chiâng kâi rơbot, kơmêi lim hiăng chiâng mâu khu ngế ki rơkê rơngê ting ting mâu tơdroăng ki hmâ hlo, hmâ ai tung pơlê pơla.

Pôa Y Tư tối ăm ‘nâi: “Sap ing á châ 14, 15 hơnăm nah, nôu pâ jâ pôa hiăng hmâ hnê ăm á tơdroăng rơngê, ting ting M’nông. Nôkố á hiăng 57 hơnăm, ai hên mâu tơdroăng rơngê, ting ting á ối chôu vế, ối rơbot, á kô pơtối hnê ăm mâu nhŏng o, kuăn cháu, vâi hdrêng. Mâu khế hơnăm hdrối mê hiá nah, á xuân hiăng veăng hnê lâm rơngê ting ting ki cheăm po, vâ hnê ăm rêm ngế nhŏng o tung pơlê”.

Tơdroăng rơngê ting ting M’nông cho tơdroăng ki ôh tá păng lôi tung rêh ối, tơdroăng tơmiât tơchĕng, mâu tơdrá rơngê ting ting mê pơrá lo ing tơdroăng pêi chiâk pêi deăng, tơdroăng lăm tung kong, tung ngo, loăng nhâ, pơlê cheăm. Mâu tơdroăng ki ‘nâi, ki hlo mê châ mơhno tối tung mâu tơdroăng pơto pơtih, tơdroăng ki rêh ối rêm hâi. Vâ tơdroăng rơngê ting ting kố ôh tá tro hía, mâu khu râ, kơvâ cheăng a tơring Dak Rlâp hiăng pơkâ, pêi pro hên troăng hơlâ vâ pơtối châ rak vế, chôu ‘măn ƀă pơtối mơnhông ‘na tơdrá hơdruê ki lĕm tro dêi hdroâng kuăn ngo kố. Pơla hdrối mê hiá nah, vâ pơtối châ rak vế ki kơnía git dêi mơhno túa lĕm tro M’nông, kơvâ ngăn ‘na mơhno túa lĕm tro tơring hiăng lăm pôu ngăn, hnê mơhno, po mâu lâm hnê tơdrá rơngê ting ting. Tơdrêng amê, tơring ai tơkŭm po mâu tơdroăng hnê hriâm rơngê ting ting M’nông tung mâu hâi leh mơdĭng dêi pơlê pơla.

Tiô hlá tơbeăng Dak Nông online

Nhat Lisa tơplôu