VOV4.Sêdang - Tung 6 khế apoăng hơnăm, rơxông nếo Dak Lak hiăng pêi pro châ lối 13 rơpâu to kế tơmeăm, xing xoăng tơdroăng cheăng ăm droh rơtăm, veăng kum mơjiâng thôn pơlê nếo, tŏng kum mâu tơring, cheăm ki xơpá tung kong pơlê. Ki nhên gá, tung 6 khế hdrối kố nah, lâp kong pơlê hiăng pêt nếo ƀă rak ngăn vâ chê 41 rơpâu to xiâm loăng ngiât, mơjiâng pro 47 tíu ki tơkŭm hôp, xah hêi ăm  droh rơtăm mâu phô̆m vâ xông kân a mâu cheăm, bêng, pơlê kân. Pêi pro vâ chê 200 to kế tơmeăm hơnăm ối nếo ƀă tŏng kum lối 37 rơpâu ngế mâu phô̆m vâ xông kân ki ai tơdroăng rêh ối xơpá.

Rơxông nếo Dak Lak ai hên tơmiât ki rơkê plĕng tung tơbleăng tơdroăng cheăng

Mơjiâng pro 5 túa pơkâ, troăng hơlâ tŏng kum droh rơtăm ki xơpá, kum 53 tơdroăng tơkêa pơxiâm vâ pêi cheăng, droh rơtăm pơxiâm vâ pêi cheăng ƀă tŏng kum mung liăn vâ chê 48 rơtal ăm droh rơtăm mơnhông cheăng kâ. Tiô mơnhên tối dêi Khu pơkuâ ngăn Đoân droh rơtăm kong pơlê Dak Lak, tung 6 khế hdrối kố nah, maluâ tro tơdjâk ing pơreăng COVID-19 pro mâu tơdroăng cheăng tơ’noăng po tung tơdroăng ki xơpá khât, hên tơdroăng cheăng athế tro pơtê ƀă pơtê hlối.

Laga, mâu tơdroăng cheăng xuân ối châ tơbleăng tiô túa ki tơdâng tơ’mô, hên tíu cheăng hiăng ai tơdroăng hbrâ rơnáu tung tối tơbleăng pêi pro mâu tơdroăng pơkâ, rế rak tơniăn pêi klêi hnoăng cheăng, tơdrêng amê hnối hbrâ rơnáu tơrŭm ƀă khu ki ai tơdjâk troh vâ hbrâ mơdât pơreăng.

Katarina Nga tơplôu ƀă tơbleăng