VOV4.Sêdang - Sap ing 12 chôu kơhâi dế lơ 19/7, kong pơlê Lâm Đồng pơklât thế tâi tâng mâu ngế ki vê rơxế, ngế kum cheăng ăm ngế ki vê rơxế pơto chơ kế tơmeăm pôi tá chiâng vêh dêi a rơpŏng hngêi, athế ối pơtê a mâu tíu ối tơkŭm xua Vi ƀan hnê ngăn mâu tơring ƀă pơlê kong kơdrâm tung kong pơlê xing xoăng ăm. Ƀă tơdroăng ki pơto chơ kế tơmeăm ngi kong pơlê ki ê, bu ăm phêp mâu rơxế chơ tơmeăm ki kal, kế tơmeăm kum ăm tơdroăng mơjiâng pro tê mơdró pêi cheăng la athế xúa mâu tơdroăng pơkâ hbrâ mơdât pơreăng tiô pơkâ thế dêi kong pơlê Lâm Đồng.

Lâm Đồng pơklât thế mâu ngế ki vê rơxế, ngế ki kum cheăng ăm ngế ki vê rơxế chơ kế tơmeăm pôi tá vêh a rơpŏng hngêi, mê athế lăm ối a tíu ối tơkŭm

Tơdrêng amê, ngế ki vê rơxế, ngế ki kum cheăng ăm ngế ki vê rơxế drêng vêh Lâm Đồng athế lăm chêh dêi inâi châ chăn tíu prôk lăm a tíu gak séa ngăn hbrâ mơdât pơreăng COVID-19 ƀă athế rêh ối, a tíu ki vâi ăm ối tơkŭm xua Vi ƀan hnê ngăn râ tơring klâ xoăng. Pôi tá chiâng vêh a rơpŏng hngêi, kơpong kuăn pơlê rêh ối vâ kơdroh iâ má môi tơdroăng ki tâ tú pơreăng ăm nhŏng o rơpŏng hngêi ƀă pơlê pơla tíu rêh ối.

Katarina Nga tơplôu ƀă tơbleăng