VOV4.Sêdang - Kŏng ti tơlo liăn rôe vaccine Việt Nam (VNVC) nếo tối ăm ‘nâi, tiô tối hdrối ing khế 7 la ngiâ, rêm măng tĭng kô ai 1 rơtuh klŏng pơkeăng vaccine AstraZeneca vêh a Việt Nam. Kố cho kơxô̆ vaccine ối tung tơdroăng môi tuăn rôe 30 rơtuh klŏng pơkeăng vaccine dêi Kŏng ti VNVC cho tíu ki apoăng djâ lối 176 rơpâu klŏng vaccine hbrâ mơdât COVID 19 AstraZeneca vêh a Việt Nam sap ing mơ’nui khế 2. Tâi tâng kơxô̆ vaccine kố châ pơtroh ăm Khu xiâm pơkuâ ngăn pơkeăng ƀă khăm pơlât kum ăm tơdroăng hbrâ mơdât pơreăng tiô troăng ôh tá xo tơvêh liăn.

Xuân tơdjâk troh vaccine, châ pơcháu hnoăng dêi Chin phuh, kơxê lơ 20/6 a tơraih tơƀai lâp plâi tơnêi Nội Bài, Khu tơpui kâ ƀă kong têa ê dêi Tơnêi têa, Khu xiâm tơpui kâ ƀă Khu xiâm ngăn pơkeăng ƀă khăm pơlât hiăng tơrŭm ƀă kăn teăng mâ kong têa Sinuâ a Việt Nam tơdah 500 rơpâu klŏng vaccine Vero-Cell dêi Sinopharm dêi Sinuâ.

A Sa Ly tơplôu ƀă tơbleăng