Prôk a troăng ƀê tong krúa lĕm, ƀă ai tŭm mơngiơk rơ-eăng lĕm, tơdjêp pơlê Ia Nueng lo a tíu ki lĕm Biển Hồ, krâ pơlê Hmrick phiu ro ăm ‘nâi, kố cho môi tung mâu troăng prôk ki châ pro ing tơdroăng mơjiâng thôn pơlê nếo, châ tơnêi têa ‘no liăn, kuăn pơlê kum hâi pêi cheăng. Troăng prôk tung pơlê krúa lĕm khât ôh ti xê kum to ăm pơlê Ia Nueng chiâng lĕm krip tâ, mê vâi krâ nhŏng o chơ tơmeăm pêi lo ing chiâk deăng tơ’lêi hlâu tâ hdrối nah hên.

Nôkố, tung pơlê, rơpŏng ki lâi xuân bro hngêi ti dế vâ rak vế krúa lĕm tơnêi tơníu, hyôh kong prâi, ôh ti ai xếo mâu chu, í peâp păn tung kơdrâm hngêi trá môi tiah hên hơnăm hdrối mê hía nah. Krâ pơlê đi đo pơchân kuăn cháu pêi pro tro mâu troăng hơlâ pơkâ dêi Đảng ƀă Tơnêi têa:

“Cheăm Biển Hồ mơ-eăm mơjiâng thôn pơlê nếo mơdêk môi tiah mâu pơkâ hiăng mơ’no. Tung hơnăm 2024 la ngiâ ah ngin kô mơ-eăm mơhnhôk vâi krâ nhŏng o vâ vâi hlê ƀă veăng tơdjuôm ivá mơjiâng thôn pơlê mơdêk. Vâi krâ nhŏng o tung pơlê xuân athế khŏm mơ-eăm rơtế ƀă khu kăn pơkuâ cheăm, thôn, hnê tối ăm vâi krâ nhŏng o hlê nhên vâ vâi môi hiâm mơno, tơdjuôm ivá ƀă khu kăn pơkuâ cheăm pro tro môi tiah mâu tơdroăng pơkâ hiăng mơ’no”.

A chê pơlê Ia Nueng, cho pơlê Phung xuân ai hên tơdroăng ki pơhlêh. Ôh ti xê to troăng ƀê tong nếo, hngêi hôp tơdjuôm lĕm kâk, mê khôi túa lĕm tro ton nah dêi vâi krâ nhŏng o xuân rế hía rế châ mơdêk. Pôa Đưk, kăn thôn pơlê Phung ăm ‘nâi, vâi kơdrâi tung pơlê hiăng mơjiâng khu pêi cheăng tơrŭm tĕn hmôu, ếo pơtâk rế hía rế hmâ ƀă tơdroăng pêi chiâk deăng tê mơdró mâu kế tơmeăm ki pro ƀă kŏng khôi hmâ, tro ƀă mơnhông ôm hyô.

Tung pơlê xuân ai kâu lak ƀô̆ hnê tŏn chêng koăng tung mê ai 43 ngế veăng, cho tíu ki hnê tối ‘na túa lĕm tro hơniâp ro, rơdêi dêi droh rơtăm. Pôa Đưk ăm ‘nâi, hơnăm 2024, Kuăn pơlê pơlê Phung pơtối mơ-eăm pêi klêi mâu tơdroăng pơkâ ki tá hâi pêi klêi:

“Pơla kố nah pơlê Phung nếo châ mơnhên thôn pơlê nếo, tơdroăng kố pro ăm vâi krâ nhŏng o tung pơlê phiu ro xua châ Đảng, tơnêi têa tơmâng ngăn, nôkố vâi krâ nhŏng o tung pơlê veăng roê ƀaoh hiêm khăm pơlât. Ing hnoăng cheăng mơhnhôk hnê tối mê vâi krâ nhŏng o xuân hiăng hlê ‘na ki pơxúa, drêng châi tamo tơdroăng ki khăm pơlât kô châ tŏng kum iâ ‘na liăn ngân rơpŏng hngêi. Má péa nếo cho mâu rơpŏng xuân kơhnâ tung tơdroăng ki po rơdâ tơnêi tơníu troăng prôk tung thôn pơlê, rak vế ngiât krúa tâ tá pơlê, mơ-eăm pei cheăng kâ mơnhông mơdêk rơpŏng hngei, pơtối mê nếo cho tơdroăng ki pro inâi điê̆n tưh ngin kô mơ-eăm tŏng kum vâ rak tơniăn tâi tâng pơ’leăng mâ mơngế kô pro klêi inâi điê̆n tưh”.

Tiô jâ Bà Đinh Thị Hoa, Kăn phŏ hnê ngăn Vi ƀan cheăm Biển Hồ troh nôkố cheăm hiăng pêi klêi 16/19 tơdroăng pơkâ dêi thôn pơlê nếo mơdêk. Tiah mê, tâi tâng troăng prôk tung thôn ƀă ki xŏn 20km hiăng châ ok ƀê tong, lối 17km troăng lăm ngi klâng xuân hiăng châ ok ƀê tong. Mâu tơdroăng pêi pro túa lĕm tro môi tiah pro kuât, hngêi lăm dế tơdjuôm châ bro lĕm. A rêm pơlê, kuăn pơlê hiăng rế hía rế hmâ ƀă tơdroăng pêi chiâk deăng tiô pơkâ, lối 90% ƀăng tơnêi pei chiâk deăng hiăng châ xúa kơmăi kơmok, tôh kế tơmeăm xuân xúa kơmăi ki chiâng tôh xêh ƀă kơdĭng.

Mâu tơdroăng rêh ối môi tiah xúa têa krúa, châ rak ngăn ivá khăm pơlât, ai tíu ki xah hêi ăm kuăn pơlê la pơrá châ rak tơniăn. Laga, xua tơdroăng ki xiâm ‘na khôi túa tơlá, mê ối ai mâu tơdroăng pơkâ môi tiah 3% kơxô̆ ngế hlâ châu prâu, lơ tơdroăng pơkâ ‘na pơkâ inâi điê̆n tưh, tơkŭm pêi chiâk deăng, kal pơtối pêi klêi tung mâu hơnăm ki pơtối.

“Hơnăm kố pêi lo liăn rêm ngế châ 57,6 rơtuh môi ngế tung môi hơnăm cho tơkâ luâ tâng vâ pơchông ƀă pơkâ mơ’no. Má péa cho hngêi trăng, troăng klông dêi cheăm hiăng châ rak vế, troăng prôk châ ok ƀê tong troh vâ tâi ƀă dế tơbleăng pro vâ pêi klêi hnoăng cheăng hơnăm 2023. Tơdroăng rêh ối dêi kuăn pơlê châ mơdêk khât, pêi lo liăn châ hên. Tơdroăng ki mơjiâng thôn pơlê nếo mơdêk pro pơxúa tơƀrê hên ƀă pơxúa tro ƀă túa pơkâ Kuăn pơlê châ ‘nâi, châ pêi ƀă châ xúa”.

Ƀă tơdroăng ki môi hiâm mơno ‘mâi mơnhông xơpá, khu kăn pơkuâ ƀă Kuăn pơlê cheăm Biển Hồ, pơlê kong kơdrâm Plei Ku dế pơtối mơjiâng thôn pơlê nếo mơdêk rế hía rế hơ’lêh a kong ngo Gia Lai.