Ƀă troăng pêi ‘’kơbố ai ki klâi veăng tơlo ki mê, kơbố ai hâi pêi cheăng veăng hâi pêi cheăng, kơbố ai tơmeăm veăng tơlo tơmeăm, kơbố ai hên veăng tơlo hên, kơbố ai iâ veăng tơlo iâ’’, kơxo lơ 18/9, a pơlê kong kơdrâm Kon Tum, kong pơlê Kon Tum tơkŭm po Leh mơhnhôk tơdroăng tơ’noăng ‘’Tơdjuôm ivá xut tah lôi hngêi pơtân, hngêi xiê kơchoh’’ ƀă pơkâ troh tâi hơnăm 2025 kô ôh tá ai xếo rơpŏng kơtiê, vâ chê kơtiê thế rêh tung mâu toăng hngêi pơtân xiê kơchoh.

Tung mâu hơnăm hiăng hluâ, mơhé hiăng tơmâng mơdêk tơdroăng pêi kố, laga xua tơdroăng cheăng kâ – rêh ối pơlê pơla ối hên pá puât, troh nôkố kong pơlê Kon Tum u ối 1.500 rơpŏng kal châ tŏng kum xut tah hngêi pơtân, hngêi xiê kơchoh; tung mê ai lối 1.000 rơpŏng kal mơjiâng hngêi nếo ƀă vâ chê 500 rơpŏng kal rơnêu hngêi ối. Xông tơpui a leh mơhnhôk pêi pro, pôa Lê Ngọc Tuấn, Kăn hnê ngăn Vi ƀan kong pơlê Kon Tum tối ăm ‘nâi troh tâi hơnăm 2025 tâi tâng mâu rơpŏng tung kong pơlê pơrá tơniăn tíu ối.

A leh mơhnhôk tơdroăng tơ’noăng ‘’Tơdjuôm ivá xut tah hngêi ối pơtân, hngêi xiê kơchoh’’ dêi kong pơlê Kon Tum, mâu khu pú hên, ngế krê ai hiâm tuăn tŏng kum mơngế pá puât hiăng lo veăng tŏng kum lối 500 rơtuh liăn ƀă kĭ tŏng kum tâi tâng kơxô̆ liăn lối 3 rơtal liăn.