Hô̆i đong tiâ mơnhên ăm rĕng lo hdrối tâ hâi khế pơkâ hơnăm 2024 hiăng hôp séa ngăn inâi pơkâ thế Kăn xiâm hnê ngăn tơnêi têa kơ’nêi ăm lo hdrối tâ hâi khế pơkâ ƀă mâu ngế ki tro kroăng phâk ki ai tŭm tơdroăng ki châ lo hdrối tâ hâi khế pơkâ drêng 79 hơnăm hâi mơjiâng Tơnêi têa Kŏng hòa xah hô̆i chuh ngiah Việt Nam ƀă 70 hơnăm Hâi Tơleăng lĕm Pơlê kong xiâm.

Ing hơnăm 2009 nah troh nôkố, Kăn xiâm hnê ngăn tơnêi têa Kŏng hòa xah hô̆i chuh ngiah Việt Nam hiăng 9 hdroh kĭ ăm lo hdrối tâ hâi khế pơkâ ƀă mâu ngế ki tro kroăng phâk ƀă lối 92 rơpâu ngế kroăng phâk, pêi cheăng, hriâm tâp tơtro vêh dêi ƀă rơpŏng hngêi, pơlê pơla pro kuăn pơlê ki ai pơxúa ăm pơlê pơla.

Vâ tơdroăng ki séa ngăn kĭ pơkâ rak tơniăn, tro luât, tro pơkâ, mê pơkâ thế dêi rôh ăm lo hdrối tâ kố tiô troăng pơkâ dêi Đảng ƀă Pơkâ dêi Kăn xiâm hnê ngăn tơnêi têa, Ngế pro xiâm phŏ hnê ngăn Chin phuh cho pôa Nguyễn Hòa Bình pơkâ thế mâu kơ koan ki ai tơdjâk tơkŭm séa ngăn, mơnhên tối tơdrăng, lĕm; séa ngăn nhên mâu ngế ki châ ăm lo hdrối hâi khế pơkâ, séa ngăn tơdroăng pơkâ, tiô pơkâ dêi Luât ăm lo hdrối tâ hâi khế pơkâ ƀă tơdroăng Pơkâ dêi Kăn xiâm hnê ngăn tơnêi têa.