Rơpŏng pôa Hà Văn Tân, a thôn 11, cheăm Ya Tờ Mốt cho môi tung mâu rơpŏng kuăn pơlê pêi chiâk ƀlêi chiâng mơdâ pêt báu Briêt châ mơnhên hưh cơ ki apoăng dêi tơring Ea Súp. Pôa Tân tối: pêt báu hưh cơ gá pá tâ báu ki tiah hmâ, phon rơvât, pơkeăng xôh kơdê oâ hdrong athế cho pơkeăng ƀă sinh hok. Pơhlêh amê ivá chía lĕm xua ôh tá xúa tơdrêng mâu trếo pơkeăng. Kơxô̆ liăn ‘no hrê roê mâu tơmeăm kơdroh 40% la tê châ tơniăn ƀă yă tê kơnâ tâ 1,5 xôh tâng vâ pơchông ƀă yă báu tiah hmâ:

“Tung pơla hâi khế tơrŭm ƀă khu pêi cheăng tơrŭm kơdroh kơtiê Ea Súp pro tơ’lêi hlâu ăm rơpŏng á pêi báu hưh cơ Briêt, má môi cho rak vế kong prâi tơnêi tơníu, má péa rak vế ivá châ chăn ƀă má pái nếo pro pơxúa ‘na liăn ngân ăm rơpŏng hngêi. Troh nôkố, ngin hiăng pêi ing tơxĭn troh kân. Troh nôkố, ngin mơhnhôk mâu rơpŏng vâ pêi hên tâ nếo”.

Briêt cho túa phái ki lĕm dêi Tây Nguyên, ối châ khĕn cho phái khêi Briêt, gá kơnía khât ‘na trếo kơhiâm, ai hên sắt, xơ, vitamin ƀă mâu trếo ki mơdât oxy hoă mê rế hía rế châ vâi hâk vâ kâ. Pôa Nguyễn Việt Đức, Kăn pơkuâ Khu pêi cheăng tơrŭm Kơdroh kơtiê Ea Súp, tơring Ea Súp, kong pơlê Dak Lak ăm ‘nâi: Pơhlêh ing hên rơnó hdrối, Khu pêi cheăng tơrŭm pơtối tơrŭm ƀă kuăn pơlê, rah xo kơpong pêt tơtro vâ mơdâ pêt hdrê báu Briêt.

Tung mê, ki kal cho ai têa, tơnêi, hyôh kong prâi krúa châ kơjo má môi. Hơnăm nah, Khu pêi cheăng tơrŭm hiăng pêt tơƀrê túa pơka pêt báu Briêt tiô pơkâ hưh cơ tiô pơkâ JAS (Nhuk) túa pơkâ 3 ha ƀă kloăng phái Briêt châ Mơnhên OCOP 3 hơlŏng râ kong pơlê. Tiô pôa Nguyễn Việt Đức, Kăn pơkuâ Khu pêi cheăng tơrŭm Kơdroh kơtiê Ea Súp, tung la ngiâ ah, Khu pêi cheăng tơrŭm kô pơtối tơrŭm ƀă kuăn pơlê thăm mơdêk ƀăng klâng pêt báu hưh cơ, rế hía rế hơ’lêh tơmiât, túa pêi dêi kuăn pơlê, veăng kum mơdêk ki dâi lĕm ƀă ki kơnía dêi báu, phái tơring cheăm.

 “Má môi, ngin tơkŭm tung mâu kế tơmeăm ki châ mơnhên hưh cơ hiăng ai inâi. Má 2, ngin po rơdâ tơ’nôm ƀăng tơnêi tiô pơkâ GlobalGAP vâ po rơdâ ƀăng tơnêi vâ hên kuăn pơlê pêi chiâk châ xúa ki pơxúa tâ”.

Tiô pôa Nguyễn Bá Bân, Ngế xiâm ngăn Ƀơrô pêi chiâk deăng tơring Ea Súp, maluâ ƀăng tơnêi tá hâi hên la phái Briêt châ diâp mơnhên hưh cơ cho mơhno ăm tơdroăng ki hơ’lêh tung túa tơmiât pêt dêi kuăn pơlê pêi chiâk deăng kơpong tơkăng kong Ea Súp, tối ôh ƀă trếo pơkeăng, pêt báu krúa. Tơdrêng amê hlối ăm hlo, tơdroăng ki hơ’lêh túa pơkâ pêi chiâk deăng tiô troăng hưh cơ dêi kong pơlê Dak Lak dế cho troăng prôk ki tro, pro pơxúa kơnía liăn ngân veăng kum hơ’lêh tơdroăng rêh ối ăm vâi krâ nhŏng o kơpong tơkăng kong:

“Tơdroăng ki khu pêi cheăng tơrŭm Kơdroh kơtiê Ea Súp châ hbru ăm hlá mơ-éa mơnhên pêt tơmeăm hưh cơ, mê cho hvêa chêng prôk ki apoăng dêi troăng tơmiât vâ pêt tơmeăm hưh cơ. Tung la ngiâ ah, kô ai hên khu tơrŭm, mâu ngế krê tŏng kum mâu khu pêi cheăng tơrŭm, khu mơdró kâ châ mơnhên hưh cơ rế hía rế hên tâ pro pơxúa kế tơmeăm châ mơnhên dêi kế tơmeăm”.