VOV4.Sêdang - Kơxê lơ 30/6, a  tíu  mơ’no  Rơ’jiu xiâm Tơnêi têa - 58 Quán Sứ - Hà Nội , Rơ’jiu xiâm Việt Nam tơkŭm po leh tơbleăng ƀă pơcháu Pơkâ dêi Ngế pro xiâm hnê ngăn Chin phuh pôk Ngế pơkuâ Rơ’jiu xiâm Việt Nam . A hâi lêh pôk, xo hnoăng pơkâ dêi Ngế pro xiâm hnê ngăn Chin phuh, pôa Phạm Bình Minh, Ngế cheăng tung Khu xiâm kal kí, Ngế pro xiâm phŏ hnê ngăn tơnêi têa pơcháu Pơkâ dêi Ngế pro xiâm hnê ngăn Chin phuh pôk, Ngế pơkuâ Rơ’jiu xiâm Việt Nam ăm pôa Đỗ Tiến Sỹ.

Tơbleăng ƀă pơcháu Pơkâ pôk Ngế pơkuâ Rơ’jiu xiâm Việt Nam

Nhoăm tơmâng xo mâu tơdroăng hnê tối ki kơnía ƀă pơcháu hnoăng cheăng pêi dêi pôa Phạm Bình Minh, Ngế pro xiâm phŏ hnê ngăn tơnêi têa, mê pôa Đỗ Tiến Sỹ, Ngế pro pơkuâ Rơ’jiu xiâm ăm ‘nâi, tung la ngiâ, Rơ’jiu xiâm Việt Nam kô mơ-eăm mơdêk cheăng ƀă kơmăi kơmok, mơdêk xúa kih thuât ki nếo, tí tăng ‘nâi plĕng, xúa kơmăi kơmok túa nếo nôkố tung tơdroăng chêh mơ’no mâu tơdroăng tung rơ’jiu, um tơvi; đi đo pơkâ ƀă pêi pro tro mâu tơdroăng pơkâ dêi tơdroăng cheăng ‘na hlá tơbeăng ƀă rak tơniăn mâu tơdroăng nếo ai tối tro, tơdrăng, ƀĕg ƀeăn, ai mơnhên ngăn; mơhno hnoăng cheăng môi cho mâu tíu tối tơbleăng, hlá tơbeăng ki má môi dêi Đảng, Tơnêi têa tung chêh tơbleăng tơdroăng nếo ai, mơhno troăng hơlâ ‘na tơpui kâ.

Gương tơplôu ƀă tơbleăng