VOV4.Sêdang -  Nôkố tơnêi têa pin ối kal vâ hên vaccine vâ tơniăn ‘na mơdât pơreăng ăm kuăn pơlê. Hlo drêng ai hên ngế kal vâ pâk mê tung măng internet hiăng hlo ai hên rơkong chêh krếo mâu kơ koan, khu tơrŭm cheăng, mâu khu mơdró rôe vaccine COVID-19 lơ pâ ăm mâu ngế pêi cheăng, mâu khu tơrŭm cheăng...

Vâ ví kơ tơdroăng ki khu ‘mêi hêak pơloi pâk vaccine COVID-19 ki ôh tá xê khât, ôh tá ‘nâi xiâm ki mơjiâng pro, ôh tá krúa lĕm, ôh tá tơniăn, Khu xiâm ngăn pơkeăng pơlât hnê tối kuăn pơlê pôi tá xúa pâk mâu vaccine ki ôh tá ‘nâi xiâm mơjiâng pro.

Khu xiâm ngăn pơkeăng pơlât hnê tối ăm mâu kong pơlê, khu tơrŭm, khu mơdró ki kal vâ rôe vaccine hbrâ mơdât COVID-19 thế châ tơpui tơno tơdrêng ƀă khu ki mơjiâng pro vaccine, pôi tá rôe ing mâu khu, mâu ngế ki tơbleăng tối ối tơdế rá. Mâu túa vaccine hbrâ mơdât COVID-19 ki xúa pâk a Việt Nam thế châ Khu xiâm ngăn pơkeăng pơlât ăm hlá mơ-eá phêp chiâng xúa pâk ƀă mâu ngế kal tơdrêng tung hbrâ mơdât pơreăng.

Khu xiâm ngăn pơkeăng pơlât tối: Vaccine châ pâk tê kơtê ăm kuăn pơlê. Xua mê, kuăn pơlê pôi tá préa, thế tơkôm ‘nôi troh dế tơná mê vâ pâk vaccine hbrâ mơdât COVID-19 drêng kơ koan ngăn pơkeăng tơbleăng. Pakĭng mê, thế đi đo hbrâ rơnáu lơ ai mâu ngế krếo chêh inâi pâk vaccine mơdât COVID-19 tung măng internet, tơbleăng tin nhắn, ƀă tơbleăng mơhno ing ki ê.

Gương tơplôu ƀă tơbleăng