VOV4.Xơ Đăng - Klăng roh leh tơbâ 50 hơnăm hâi mơjiâng tơrŭm tơpui kâ pơla tơnêi têa Việt Nam ƀă kong têa Ấn Độ, lơ 7/1, mê hâi lơ 7/1/2022, a tíu pêi cheăng Khu xiâm tơpui kâ, pôa Nguyễn Quốc Dũng, Ngế xiâm phŏ tơpui kâ ƀă pôa Pranay Verma, Kăn teăng mâ kong têa Ấn Độ hiăng tơdah kơthô rơkâu dêi pôa Nguyễn Xuân Phúc, Kăn xiâm hnê ngăn tơnêi têa ƀă pôa Ram Nath Kovind, Kăn xiâm pơkuâ kong têa Ấn Độ; kơthô rơkâu dêi pôa Vương Đình Huệ, Kăn xiâm hnê ngăn Kuô̆k hô̆i ƀă Kăn xiâm phŏ pơkuâ kong têa, pôa Venkaiah Naidu, Kăn xiâm hnê ngăn Kuô̆k hô̆i râ má môi ƀă Pôa Om Birla, Kăn xiâm hnê ngăn Kuô̆k hô̆i râ má péa.

Tung kơthô rơkâu, mâu kăn pơkuâ Việt Nam tối Việt Nam ƀă Ấn Độ nôkố hiăng chiâng mâu ngế pú hmâ, khu tơrŭm cheăng ki loi tơngah ƀă tơdroăng pơkuâ péa tơnêi têa ing tơbleăng troăng tơmiât pêi la ngiâ tơdjuôm dêi Việt Nam - Ấn Độ ‘na hơniâp lĕm, mơnhông mơdêk ƀă kuăn pơlê hiăng mơjiâng tơ’nôm mâu tơdroăng tơdjâk nếo mơnhông mơdêk ki kal tơrŭm cheăng ton xŏn tung hên kơvâ cheăng tơrŭm cheăng, djâ pơxúa ăm Chin phuh ƀă kuăn pơlê péa tơnêi têa.

A Sa Ly tơplôu ƀă tơbleăng