1. Tơdroăng pro rế lĕm khu tơrŭm cheăng  dêi mâu kăn, xing xoăng pro rế lĕm nếo tơdroăng cheăng pêi ƀă pêi cheăng dêi mâu kăn kong pơlê 2 râ

Hâi lơ 1/7/2025, lâp tơnêi têa pêi cheăng tiô khu kăn kong pơlê péa râ. 63 to kong pơlê, pơlê kong kân klêi tơ’mot, tơdjuôm ối 34 to kong pơlê, pơlê kong kân ƀă 3.321 to cheăm, bêng, kơpong. Pôa Tô Lâm Kăn xiâm pơkuâ hnê ngăn Đảng tối nhên pơkâ “xing xoăng pro rế lĕm tơnêi têa” cho hvêa prôk ki tơƀrê ai pơxúa khât, hdró môi rôh mơnhông  tơƀrê nếo tung tơdroăng mơjiâng klêi khu kăn tơnêi têa, pê klêi luât pơkâ ƀă tơrŭm cheăng dêi khu xiâm kal kí tơdrêng, iâ mơngế, pêi cheăng rơhéa, ai pơxúa, la ngiâ pê klêi môi tơdroăng cheăng rak ngăn túa nếo, achê kuăn pơlê, xua kuăn pơlê, pêi cheăng ăm kuăn pơlê, vâ tŭm tơdroăng ki pơxúa ăm kuăn pơlê.

Hdrối mê, pêi pro tiô Pơkâ kơxô̆ 18-NQ/TW dêi Khu kăn xiâm Đảng hneăng 12, klêi xing xoăng pro rế lĕm, rah iâ mơngế hiăng kơdroh 4 kơ koan Đảng râ xiâm Tơnêi êa; 25 khu kăn Đảng; 16 đảng đoàn; 5 kơ koan dêi Kuô̆k hô̆i; 5 Khu xiâm ƀă 3 kơ koan cho dêi tung Chinh phuh; 30 tíu pêi cheăng xiâm râ Khu xiâm pơkuâ; 1.025 tíu pêi cheăng râ pá xôp ki xiâm; 4.413 chi cục, ƀơrô ƀă 240 tíu pêi cheăng ăm tơnêi têa. A kong pơlê kơdroh 466 khu xiâm pơkuâ cheăng; 644 đoàn, đảng đoàn ƀă khu kăn đảng; 3.984 tíu pêi cheăng râ bơrô; 27 đảng ƀô̆ râ kơpêng ƀă mâu khu tơrŭm cheăng Đảng.

2.Tơbleăng ăm pêi pro 7 tơdroăng pơkâ ton xŏn djâ tơnêi têa mot tung chal mơnhông nếo

7 tơdroăng pơkâ ton xŏn dêi Khu xiâm kal kí tơbleăng mơ’nui hơnăm 2024 ƀă 2025, tung mê 4 tơdroăng pơkâ: Tơdroăng pơkâ kơxô̆ 57 –NQ/TW ‘na mơnhông mơdêk khoa hok, kŏng ngê̆ pơhlêh nếo tơmiât pêi rơkê ƀă pơhlêh xúa kŏng ngê̆ tơnêi têa; Tơdroăng pơkâ 59-NQ/TW ‘na mot tơrŭm lâp plâi tơnêi tung rơxông nếo; Tơdroăng pơkâ kơxô̆ 66-NQ/TW ‘na pơhlêh nếo tơdroăng mơjiâng ƀă pêi pro luât tơxâng pơkâ mơnhông tơnêi têa tung chal nếo; Tơdroăng pơkâ 68-NQ/TW ‘na mơnhông cheăng kâ krê châ ngăn cho ‘’khu pŭn trăng’’ ƀă mâu tơdroăng ki xiâm vâ mơnhông tơnêi têa tung pơla nôkố, 3 tơdroăng pơkâ tơdroăng cheăng kơxô̆ 70-NQ/TW, 71-NQ/TW, 72-NQ/TW, tơxâng ƀă 3 kơvâ cheăng ‘’tơnêi têa mơjiâng cheăng pêi ăm kuăn pơlê’’ ai tơdjâk troh rêm kuăn pơlê cho ivá mơnhông, hnê hriâm ƀă hnê mơjiâng cheăng pêi, rak ngăn ivá kuăn pơlê. Rêm tơdroăng pơkâ tơkŭm tung môi kơvâ ki xiâm laga pơrá môi tuăn môi pơkâ tơdjuôm cho mơjiâng xiâm kối krá vâ Việt Nam mơnhông rĕng, krá tơniăn.

Rêm khu râ kăn pơkuâ hnê ngăn cheăng Đảng, khu cheăng Đảng, kơ koan tơnêi têa, khu râ ing Tơnêi têa troh tíu cheăng hiăng thâ pêi inhên mâu tơdroăng pơkâ chiâng tơdroăng pêi cheăng, tơdroăng tơkêa bro, pơkâ pêi inhên, pôu râng hnoăng cheăng ối a ko ƀă tơdroăng châ tơƀrê pêi pro, tơniăn ‘’nhên tơdroăng cheăng, nhên mơngế, nhên tơdroăng pêi pro, nhên tơdroăng châ tơƀrê’’.

3. Kuô̆k hô̆i ‘mâi rơnêu Luât ƀă tơbleăng hên luât pơkâ pêi thế tơƀrê

Hâi lơ 16/6/2025, a rôh hôp má 9, ƀă 100% ngế ai mâ hiăng vâ môi tuăn, Kuô̆k hô̆i hiăng tơbleăng pơkâ ‘mâi hơ’lêh tơ’nôm mâu tơdroăng Luât hơnăm 2013. Pơkâ ki sap nah hâi chói ai mê chiâng tơdroăng ki tro luât ăm tơdroăng pro rế lĕm rah iâ tê mơngế pêi cheăng  ăm tơnêi têa, ai tiô pơkâ mơnhông tung mâu hơnăm la ngiâ, malối cho xing xoăng pro rế lĕm khu kăn pêi cheăng dêi kong pơlê ƀă mâu pơkâ ‘na Măt trâ̆n Tơnêi têa Việt Nam, mâu khu tơrŭm cheăng kal kí - pơlê pơla, mâu khu kuăn pơlê xua Đảng, Tơnêi têa pơcháu hnoăng cheăng.

Luâ 2 rôh hôp tiah hmâ ƀă 1 rôh hôp ki phá xêh tung hơnăm 2025, Kuô̆k hô̆i hneăng 15 ai mâu tơdroăng pơ’lêh ki tơbrê, ing tơbleăng tâi tâng kơxô̆ 89 luât, 91 tơdroăng Pơkâ, châ lối 40% tung tâi tâng kơxô̆ luât, tơdroăng pơkâ tung plâ hneăng má 15. Kuô̆k hô̆i hiăng ‘mâi chêh, tơ’nôm hên luât pơkâ mâu tơdroăng ki kal môi tiah ‘na tơnêi, ‘no liăn pêi pro tơmeăm khoăng tơnêi têa, khu mâu kăn kong pơlê, pơcháu tơ’nôm hnoăng cheăng ăm kong pơlê chiâng pơkâ tiô troăng hơlâ ‘no liăn, xing xoăng liăn ngân, pro rế lĕm mâu kăn pêi cheăng.

4.Hneăng hôp Đảng mâu râ châ tơƀrê pro xiâm kối vâ tơkŭm po Hneăng hôp má XIV dêi Đảng

Lối 60.000 khu tơrŭm Đảng, tung mê 40/40 Đảng ƀô̆ ối tung Tơnêi têa hiăng kêi đeăng Hneăng hôp Đảng ƀô̆ Hneăng hơnăm 2025 – 2030 ƀă tíu ki tơdjuôm ô eăng má môi cho tơdroăng hbrâ inhên, tơtro, pêi pro rĕng ƀă rĕng tơniăn khu pêi cheăng tơnêi têa klêi kơ’nâi hneăng hôp. Ôh tá xê to roh hôp kal kí trâu hơngế tung tâi tâng Đảng, tâi tâng khu lêng, tâi tâng kuăn pơlê mê ối tơdroăng ki xiâm vâ tơkŭm po châ tơƀrê Hneăng hôp má XIV dêi Đảng.

Ki rơhêng vâ tối, tâi tâng 34 kăn pơkuâ hnê ngăn cheăng Đảng kong pơlê, pơlê kong kơdrâm ƀă mâu tíu pêi cheăng ki xiâm a kong pơlê klêi kơ’nâi hneăng hôp pơrá ôh tá xê ngế tung kong pơlê mê, tiô tro hnê mơhno dêi Tơnêi têa, mơhno tơdroăng ki khŏm mơ-eăm pơhlêh nếo tơdroăng cheăng rah xo kăn ƀô̆, mơdêk tơdroăng ki ôh tá tơdjâk pakong, kơdroh tâi tâng tơdroăng ki ôh tá tơniăn a kong pơlê ƀă mơdêk kheăn hôu, pơkâ kơtăng pêi cheăng tung khu cheăng kal kí.

5. Mơdêk GDP hên má môi tung 5 hơnăm hdrối

Tung pơla cheăng kâ lâp plâi tơnêi rế hên ôh tá tơniăn, malối pơloăng mơnúa xua luât pơkâ pro hnoăng mơhá dêi Mih ƀă tơdjâk ó  xua kong prâi, Việt nam pêi akơlo tâk GDP hơnăm 2025  kơpêng 8% (Po ngăn kơxô̆ ki tro khât drêng ai tơbleăng khât). Kố cho kơlo tâk hên má môi  tung 5 hơnăm hdrối.  Tê ăm kong ê cho ki hlo tơƀrê dêi cheăng kâ drêng tơmeăm pêi lo châ pơ’lêh chiâng tơmeăm uâ pơliê, hriăn pro.

Kơxô̆ liăn châ xo ing tê kế tơmeăm ăm kong têa ê châ lối 920 rơtal USD. Cheăng kâ kân pơtối tơniăn, ki ôh tá ai yă châ mơdât tiô tối a kơlo pá xôp 4%. Xo liăn ngân nâp ăm hngêi rak liăn tơnêi têa troh tơdế khế 12/2025 châ dâng 2,47 rơtuh rơtal liăn, luâ 25% tiô tối hdrối ƀă tâk rĕng tâng vâ pơchông ƀă hơnăm nah. GDP riân rem ko mơngế dâng 5.000 USD, tâk 1,4 hdroh tâng vâ pơchông ƀă hơnăm 2020, djâ Việt Nam châ mot tung khu kong têa pê lo liăn tơdâng hên. Kơchơ mơdró liăn ngân mơnhông tơniăn, kơchơ mơdró chứng khoán châ mơdêk chiâng kơchơ mơdró nếo xông tiô râ tung hơnăm 2025.

6.Mơdêk tơdroăng rêh ối pơlê pơla, pêi kêi đeăng têa tah hngêi pơtân, hngêi xi kơchoh

Hâi lơ 26/8/2025, tơdroăng ƀă tơdroăng tơ’noăng ‘’Lâp tơnêi têa tơdjuôm ivá têa tah hngêi pơtân, hngêi xi kơchoh’’ mơgêi klêi kơ’nâi 1 hơnăm 4 khế pêi pro, rĕng kêi đeăng rĕng lối 5 hơnăm 4 khế. Vâ chê 50.000 rơtal liăn hiăng châ xúa vâ têa tah 334.234 toăng hngêi pơtân, hngêi xi kơchoh. Hâi lơ 30/11/2025, Ngế pro xiâm hnê ngăn tơnêi têa pơtối mơhnhôk djâ, pêi pro ‘’tơdroăng pêi cheăng Quang Trung’’ thâ rĕng vêh mơjiâng, rơnêu hngêi tro tơ’nhê xua kong prâi pro a mâu kong pơlê peăng tơdế tơnêi têa ƀă pơkâ pêi kêi đeăng mơjiâng nếo 1.628 toăng hngêi hdrối hâi lơ 31/1/2026 ƀă kêi đeăng rơnêu 34.352 toăng hngêi tro tơ’nhê hdrối hâi lơ 31/12/2025.

Rơtế amê, hên troăng hơlâ châ tơƀrê hluâ pơkâ ‘na khăm pơlât, hnê hriâm hiăng châ tơbleăng ăm pêi pro. Tơdroăng pơkâ 71-NQ/TW châ pơkâ hnê tơ’nôm mâm non 3 - 5 hơnăm ƀă mơdêk kơxô̆ droh rơtăm kêi đeăng râ má pái to ki vâ iâ má môi 85% a hơnăm 2030; sap hơnăm 2025 – 2026, vâi hdrêng mâm non ƀă râ má pái hriâm hngêi trung tơnêi têa châ hriâm tê kơtê. Pơxiâm mơjiâng pro 100 toăng hngêi trung râ má pái tơdjêp râ ai tíu kâ koi pơtê hâi dế a mâu cheăm tơkăng kong. Tơdroăng pơkâ 72-NQ/TW châ pơkâ pêi plah sap hơnăm 2026 tâi tâng kuăn pơlê châ khăm ivá rêm hneăng tê kơtiê.

7.Tơƀrê ‘na mơjiâng tơmeăm khoăng, pro xiâm krá kâk ăm tơnêi têa xông tơƀrê

Hơnăm 2025 hdró ki tơƀrê rơdêi ‘na mơnhông pro hngêi trăng troăng klông, xiâm ki kal tung tơdroăng mơjiâng tơmeăm khoăng xông tơdrêng, tiô túa nếo, ai tiô púi vâ mơnhông dêi tơnêi têa tung rơxông nếo. Kơ’nâi 3 rôh leh pơxiâm pro ƀă leh hiăng klêi pro mâu tơmeăm khoăng, tơdroăng tơkêa bro ki kân, ki kal rơtế hlo mơjiâng tơdrêng tung lâp tơnêi têa; hiăng ai 564 tơmeăm khoăng, tơdroăng tơkêa bro ƀă tâi tâng kơxô̆ liăn ‘no pro lối 5,14 rơtuh rơtal liăn; vâ chê 140 tơmeăm khoăng ki kân hiăng pro klêi, ăm xúa, hlo tơƀrê.

Tung mê, ki vâ tối cho leh hiăng pro klêi, ăm rơxế mơnúa kơtâu lối 3.500km troăng kân tơdrăng, tơdah tơƀai kơneăng ki apoăng a tơraih tơƀai Long Thành, hlối xúa Tíu xiâm tơkŭm po kơchơ kân Mơđah tơbleăng tơmeăm khoăng râ Tơnêi têa, mâu tơdroăng tơkêa pro on tơhrik tíu ki kal ƀă hên ki ê, hlối pơxiâm pro tơdroăng tơkêa bo ki kân tơraih tơƀai Gia Bình, kơno tuk Hòn Khoai, khu kơphô̆ Cần Giờ, khu kơphô̆ pơtâp ivá Olympic, mâu tơdroăng tơkêa bro troăng rơxế lơ treng tung kơphô̆, hbrâ mơjiâng troăng rơxế lơ treng kơtâu têi Bắc - Nam, mâu tơdroăng tơkêa bro pơxúa ăm hôp APEC hơnăm 2027 a Phú Quốc.

8.Tơkŭm po châ tơƀrê leh kân leh tơbâ 80 hơnăm Kăch măng Khế tơheăm châ tơƀrê ƀă Hâi mơjiâng tơnêi têa lơ 2/9; 50 hơnăm Hâi tơleăng lĕm peăng Hdroh tơnêi têa, tơmot tơnêi têa chiâng môi

Hên hĭn tơdroăng leh tơbâ tung hơnăm 2025 hiăng châ tơkŭm po châ tơƀrê, kân krip, tro râ tơdroăng ki kal ƀă tơniăn păng ‘nâng. Tung mê, mâu tơdroăng pêi dêi 2 leh kân leh tơbâ 80 hơnăm Kăch măng Khế  tơheăm châ tơƀrê ƀă Hâi mơjiâng tơnêi têa lơ 2/9; 50 hơnăm hâi Tơleăng lĕm peăng Hdroh, tơmot chiâng môi tơnêi têa hiăng lôi ăm tơdroăng ki sap nah tá chói ai.

Leh ăm lêng prôk pơtăng, prôk a Plông kân Ba Đình kơxo lơ 2/9 a Pơlê kong xiâm Hà Nội ƀă a troăng Lê Duẩn kơxo lơ 30/4 a Pơlê kong kân Hồ Chí Minh ƀă rơtuh ngế kuăn pơlê ƀă mâu khu lêng veăng. Um méa khu lêng prôk pơtăng, tơdroăng prôk ‘’prôk tung hiâm mơno kuăn pơlê’’ ôh tá xê to troh lâp lu tơdroăng pơtâng hnê tối trâu hơngế ‘na tơdroăng pói vâ tơniăn krê, tơniăn lĕm, hơniâp lĕm, tơrŭm nhŏng o troh pú hmâ lâp plâi tơnêi mê ối lôi ăm tơdroăng ki tâ rơrêk tung hiâm mơno kân ‘na hiâm mơno loi nhuô̆m, hâk tơngăm hdroâng mơngế.

9.Kong prâi ôh tá tơniăn ƀă tơviah sap nah hâi chói hlo pro hlâ mơngế ƀă tơ’nhiê tơmeăm khoắng

Hơnăm 2025  cho môi tung mâu hơnăm kong prâi pro ôh tá tơniăn, ó ƀă tơviah má môi sap nah hâi chói ai ‘na hyôh kong prâi Việt Nam ƀă hên tơdroăng ki rơiô hlo a hên tíu, pơtối mâu tơdroăng pá xua kong prâi mê cho khía mơhot kân, kong mêi kân lâp lu, pro têa lân lu, têa rơlêa  tơnêi tơhnâp. Kong prâi ôh tá tơniăn tung lâp tơnêi têa hiăng pro 468 ngế hlâ, ƀă hía, 741 ngế tro rong; vâ chê 4.200 toăng hngêi tơhnâp, pro 348.834 toăng hngêi tơ’nhiê; 545.395ha báu, prá alâi tro têa lu; lŭp 71.687 kơpôu ro chu, 5,16 rơtuh to í pêap hlâ, têa mơhiu; 171.763 long păn ká ƀă hlâm tro lŭp; 1.070km rơchôa, troăng ki cho mơ’no têa troh tung klâng tro tơ’nhiê; 140km ‘noăng rơchôa, tro tơhnâp; 1.259 km troăng prôk tro tơ’nhiê... Tâi tâng ki lŭp riân lối 98.677 rơtal liăn.

10.Cheăng kơmăi khôi túa lĕm tro mơnhên tơbâ ƀă hên tơdroăng ngê̆ thuât, khu phim ki châ má môi ‘na pêi lo liăn ƀă kơxô̆ tơmối hên hên sap nah tá chói ai

Hơnăm 2025 mơnhên châ tơƀrê tơdroăng dêi cheng kơmăi kơmok khôi túa lĕm tro Việt Nam drêng kơchơ mơdró ‘na xah hêi mơjiâng mâu tơdroăng ki má môi sap nah tá chói ai ‘na pêi lo liăn ƀă kơxô̆ tơmối troh ngăn. Mâu tơdroăng châ vêh bro tiô pơkâ lâp plâi tơnêi, tơrŭm tơtro pơla ki kơnâ tiô khôi vâi krâ nah ƀă nâl tơpui xah hêi tiô rơxông no, pêng păm tơdroăng ki tâ rơrêk, gum troh lâp lu hiâm mơno pâ nhuô̆m tơnêi têa tiô troăng ki châ achê nếo. A kơvâ xup um, mơnhên ki má môi pêi lo liăn hên sap nah tá chói ai kơbong tê vĕ Việt Nam ƀă khu phim ‘’Mêi khêi’’ châ lối 714 rơtal liăn ƀă hên khu phim pêi lo liăn châ hrĭng rơtal ki ê.

Hâi lơ 14/11/2025, pôa Phạm Minh Chính, Ngế pro xiâm hnê ngăn tơnêi têa hiăng kĭ pơkâ troăng pêi cheăng ton xŏn mơnhông kơvâ cheăng kơmăi khôi túa lĕm tro Việt Nam troh hơnăm 2030, tơmiât pêi troh hơnăm 2045. Tung mê pơkâ xiâm troh hơnăm 2030, mâu kơvâ cheăng kơmăi kơmok châ kơlo tơtêk tơdâng 10%/hơnăm ƀă veăng gum 7% GDP dêi tơnêi têa. Troh hơnăm 2045 Việt Nam chiâng kong têa mơnhông ‘na cheăng kơmăi khôi túa lĕm tro, cheăng kơmăi xah hêi tung kơpong châu Á.