Tung 4 tơdroăng tơkêa bro Bảng A, ai 2 tơdroăng tơkêa bro dêi kong pơlê Dak Lak. Gia Lai ƀă Lâm Đồng, rêm kong pơlê ai 1 tơdroăng tơkêa bro. Mâu tơdroăng tơkêa bro mê ko pêi lo tơmeăm krúa lĕm ai hên trếo kơhiâm, kế kâ pơ’lêh ƀă tơmeăm ki lĕm pê lo ing chiâk deăng kong pơlê; 1 tơdroăng tơkêa bro ing kơtôu plâi sầu riêng pro chiâng tơmeăm ki kơnâ. Tiô tơdroăng ngăn ăm ‘nâi dêi mâu tơdroăng tơkêa bro a rôh tơ’noăng mơgêi rôh Pơxiâm pêi cheăng krúa lĕm kơpong Tơdế Tơnêi têa - Tây Nguyên hơnăm kố, Khu châm điêm hlo hên đô̆i hiăng ai túa vâ pêi ki nếo ƀă mâu tơmeăm khoăng dêi kong pơlê, pơ‘lêh ing tí tăng hriĕn pro ing mâu tơdroăng pêi pêt troh xúa mâu kotôu kông hnông vâ pro chiâng tơmeăm ki pơxúa ê nếo.

Ngế rơkê ‘na cheăng kâ Phạm Chi Lan, ngế tí tăng ‘nâi plĕng hnê ‘na tơdroăng mê tối: mâu tơdroăng tơkêa bro ối ăm hlo ivá ki tơdjêp, kơjo kum dêi rơpó tung tơdroăng pêi lo tơmeăm ai pơxúa, hlối chôa ‘lâng xúa ứng dụng pơ’lêh ăm ngiêt lĕm, pơ‘lêh kơxô̆ pêi cheăng tiô hlá mơ-éa pơkâ mơ’no ki nếo.