Khu kăn Kuô̆k hô̆i kong pơlê Gia Lai xua pôa Châu Ngọc Tuấn, Phŏ pơkuâ ngăn Đảng ủi, Ngế xiâm pơkuâ khu kăn Kuô̆k hô̆i kong pơlê pro ngế ki pơkuâ djâ khu kăn kố nếo lăm ngăn tơdroăng pơkuâ, xúa kế tơmeăm xúa tơnêi têa cho tíu pêi cheăng a bêng Quy Nhơn.

Nônố Vi ƀan hnê ngăn bêng Quy Nhơn rak ngăn 5 to tíu pêi cheăng, ƀă tâi tâng ƀăng tơnêi lối 5.755 met karê. Cheăng xing xoăng tíu pêi cheăng ăm kơ koan cheăng tơnêi têa klêi kơ’nâi ‘mot tơkŭm ăm tơtro ƀă tơdroăng púi rơhêng vâ ki ai khât. Ai 4 tung tâi tâng 5 to tíu pêi cheăng dế châ xoăng, xúa tung tơdroăng cheăng dêi Vi ƀan hnê ngăn bêng ƀă mâu kơ koan, tíu pêi cheăng, rak tơniăn tơdroăng cheăng pôi tá tro pơtê. Klêi séa ngăn tơnêi tơníu, tá 5 tíu pêi cheăng kố hiăng châ bêng séa ngăn ‘na luât.

Laga, cheăng pơkuâ ngăn, xúa kế tơmeăm tơnêi têa xuân ối cho mâu tơdroăng ki xơpá. Ối ai mâu hồ sơ ‘na luât, hồ sơ ‘na tơnêi tơníu, hồ sơ ‘na kih thuât tá hâi tŭm; tíu chêh ‘măn mâu tơdroăng kal ‘na tơmeăm khoăng châ tơdah xo sap ing hên tíu, ing hên rôh mê kal pơtối pơhlêh, pơkâ nhên ƀă tối tơbleăng tơdrăng. Ối ai mâu tíu pêi cheăng ki ‘nâ xúa hiăng ton hơnăm hiăng tơ’nhiê, kal ‘mêng rơnêu, tung pơla kơxô̆ liăn ‘no hrê ôh ti ai.

Mơgêi roh séa ngăn, pôa Châu Ngọc Tuấn, Ngế pơkuâ Khu kăn Kuô̆k hô̆i kong pơlê Gia Lai ăm 'nâi, Gia Lai cho môi tung 12 to kong pơlê, pơlê kong kơdrâm châ Vi ƀan pơkuâ Kuô̆k hô̆i rah xo séa ngăn râ kăn xiâm 'na tơdroăng pêi pro troăng hơlâ, luât pơkuâ, xúa tơmeăm khoăng tơnêi têa cho tíu pêi cheăng klêi kơ'nâi rah xo bro lế lĕm tro khu pêi cheăng tơnêi têa, tíu pêi cheăng tơnêi têa. Khu kăn Kuô̆k hô̆i kong pơlê pơkâ thế bêng Quy Nhơn pơtối séa ngăn, pro klêi hlá mơ-éa luât ƀă mâu tíu hngêi, tơnêi; mơdêk séa ngăn, rak ngăn tơdroăng pơkuâ, xúa tơmeăm khoăng tơnêi têa. Malối, kal séa ngăn nhên mâu hngêi mơhno túa lĕm tro, tíu tơkŭm hôp pơlê pơla a mâu tôh kơphô̆ ki u ối klêi xing xoăng, rak tơniăn tơtro tiô púi vâ rêh ối dêi kuăn pơlê, ví pơkâ tơleăng tơmeăm tiô troăng pro tơdjâk ôh tá tơniăn tíu rêh ối pêi cheăng tơdjuôm.

A Dak Lak, Khu kăn Kuô̆k hô̆i kong pơlê xuân hiăng séa ngăn tơdroăng pêi pro troăng hơlâ kố a bêng Buôn Ma Thuột. Klêi kơ'nâi pêi pro túa pơkuâ cheăng râ kong pơlê péa râ, Vi ƀan bêng Buôn Ma Thuột, kong pơlê Dak Lak tơdah xo pơkuâ 64 tíu hngêi, tơnêi, tung mê 13 tíu hngêi, tơnêi, ki rơlối, tá hâi xúa. Tơdroăng tơleăng mâu tơmeăm kố trâm hên pá puât. Pôa Trịnh Vũ Quang, Kăn pơkuâ Tíu xiâm mơ'no liăn cheăng tơdroăng cheăng tơnêi têa pơkuâ bêng Buôn Ma Thuột tối ăm 'nâi, bêng dế trâm pá tung tơdroăng mơnhên yă ăm mung drêng péa tơdroăng pơkâ dêi Khu xiâm pơkuâ liăn ngân ƀă Khu xiâm mơjiâng tơmeăm khoăng ôh tá môi tuăn, hnê mơhno phá tơ-ê dêi pó:

“Tiô Pơkâ dêi Khu xiâm mơjiâng tơmeăm khoăng pơkâ hơnăm xúa ôh tá tro tâng pơchông ƀă Pơkâ 141 dêi Khu xiâm ngăn liăn ngân. Pơtih tơmeăm khoăng hngêi trăng troăng klông râ má 3 hâi khế xúa cho 50 hơnăm, la mơnhên ki kơnâ tơmeăm khoăng tiô Pơkâ 141 dêi Khu xiâm ngăn liăn ngân mê bu ai 25 hơnăm. Xua mê, ki kơnía dêi tơmeăm ối xúa gá kơnâ khât, la tơdroăng ki rơlối gá ối iâ hâi. Xua mê, xơpá tung tơdroăng mơnhên yă ăm mung xúa.

Ing tơdroăng ki ai khât kố, khu kăn séa ngăn pơkâ mơ'no tơdroăng ki xiâm: kal mơnhên tơmeăm khoăng tơnêi têa ki lối hên cho tơdroăng ki pá pơkuâ ngăn lơ tơmeăm khoăng mơnhông mơdêk.Troăng ki xúa mâu tơmeăm khoăng tơnêi têa ki rơlối dêi mâu kong pơlê kô pơkâ troăng hơlâ pơkâ tung la ngiâ. Jâ Lê Đào An Xuân, Kăn phŏ pơkuâ khu kăn séa ngăn dêi Khu kăn Kuô̆k hô̆i kong pơlê Dak Lak tơmâng xo tơdroăng ki kơhnâ ƀă kơtăng dêi bêng Buôn Ma Thuột. Ƀă mâu tơdroăng ki xơpá, tơvâ tơvân ƀă tơdroăng pâ thế dêi bêng, Khu kăn kố tơmâng xo, tơkŭm tung pơla séa ngăn a mâu cheăm, bêng ki ê vâ tơbleăng ăm Kuô̆k hô̆i. Tơdroăng pơkuâ, xúa tơmeăm khoăng tơnêi têa cho tíu pêi cheăng klêi kơ'nâi pêi pro troăng hơlâ rah xo bro lế lĕm tro tíu pêi cheăng ƀă tíu pêi cheăng cho tơdroăng ki tô tuăn, dế châ kuăn pơlê, kuăn pơlê lâp tơnêi têa tơmâng.

“Tơdroăng ki xo tơvêh, xúa tơmeăm khoăng, malối cho tíu pêi cheăng klêi kơ'nâi xing xoăng mê kal athế pêi pro châ tơ-ƀrê, pôi tá mơ'nhiê liăn. Kuô̆k hô̆i kô tơkŭm po séa ngăn kơtăng khât tung hơnăm kố ƀă tâi tâng mâu kong pơlê pơlê kong kân 'na tơdroăng kố".

Klêi kơ'nâi séa ngăn a Gia Lai ƀă Dak Lak, mâu tơdroăng tơvâ tơvân tung pơkuâ, xúa tíu pêi cheăng ƀă tơmeăm khoăng tơnêi têa klêi kơ'nâi xing xoăng hiăng châ hlo nhên tâ. Kố xuân cho xiâm kối vâ mâu khu kăn Kuô̆k hô̆i tơkŭm, pâ thế pêi klêi troăng hơlâ, rak tơniăn tơmeăm khoăng tơnêi têa châ pơkuâ krá tơniăn, xúa tro tơdroăng, tơƀrê, ví mơhrê liăn ngân ƀă kum tơƀrê tâ tơdroăng rêh ối kuăn pơlê.