Tung mâu hâi ki kố, nâ H’Ly Ƀyă, ối a bêng Thành Nhất, kong pơlê Dak Lak, lăm tăng tíu tê hlá mơ-éa hriâm vâ rôe ăm dêi péa ngế kuăn hriâm lâm 1 ƀă môi ngế hriâm lâm 10. Mâu kuăn ‘nĕng ki xơpá kal châ kơjo kum, ăm mung hlá mơ-éa hriâm, xua hdrối mê rơpŏng hngêi nâ tơkôm hngêi trung ăm hlá mơ-éa, mê ôh tá rĕng lăm rôe. Drêng hiăng troh hâi lăm hriâm, hngêi trung hâi ai hlá mơ-éa tŭm vâ ăm hok tro mung, mê nôu pâ nếo hriăn lăm rôe la tíu tê hlá mơ-éa hiăng tâi hlá mơ-éa hriâm.

“Prôk tăng lăm rôe sap hâi ki mê nah hmôu prôk klêng tê. Prôk hiăng châ 5, 6, 7 tíu tê hlá mơ-éa. Lâm 1 mê tŭm la kuăn á ki hriâm râ má 3 mê ối kal ai 4 troh 5 kơxop hlá nếo ki hâi teăm ai”.

Ôh ti xê to nôu pâ tô tuăn tăng hlá mơ-éa hriâm, a mâu hngêi trung ki ‘nâ, thái cô xuân dế tăng hlá mơ-éa vâ kơdroh ki ôh tá tŭm hlá mơ-éa hriâm vâ tơdroăng hriâm pôi tá tro pơtê tơdế rá. Cô Lê Nguyễn Phương Minh, hnê Hngêi trung phôh thong ai tíu kâ koi pơtê Râ má môi - râ má péa Buôn Đôn, cheăm Buôn Đôn, kong pơlê Dak Lak ăm ‘nâi:

“Nôkố vâ tối lâm ki lâi xuân ối ai péa pái ngế hok tro ôh tá tŭm hlá mơ-éa hriâm. Mâu vâi o mung hriâm hlá mơ-éa dêi mâu ngoh nâ ki hdrối nah xúa pơtân. Ai mâu ‘nâ péa ngế hriâm tơdjuôm 1 kơxop hlá mơ-éa, xoăng ăm dêi rơpó hriâm, ‘nâ hía pái ngế hriâm tơdjuôm môi kơxop”.

Pôa Thái Văn Lộc, Pơkuâ Hngêi trung phôh thong ai tíu kâ koi pơtê Râ má môi-Râ má péa Buôn Đôn ăm ‘nâi, klêi mot hơnăm hriâm nếo, hngêi trung xuân ối kal vâ dâng 65% kơxop hlá mơ-éa hriâm. Ki hdrối, mâu thái cô dế xúa kơxop hlá mơ-éa hriâm ki ton dêi mâu hneăng hdrối vâ tơkâ luâ iâ xơpá. Ki u ối xuân thế tơkôm:

“Hngêi trung pâ thế mâu tíu chêh in hlá mơ-éa, rĕng chêh in tơ’nôm kơxop hlá mơ-éa, malối mâu hlá mơ-éa hriâm ki ối kal hên a kơpong hơngế hơngo, vâ hok tro ai tŭm hlá mơ-éa hriâm”.

Kong pơlê Dak Lak ai dâng 650.000 ngế hok tro sap mầm non troh phôh thong dế hriâm a mâu hngêi trung. Hơnăm hriâm 2026-2027, lối 34% hok tro dêi mâu khu châ kơjo kum châ xúa luât pơkâ tŏng gum ăm hlá mơ-éa hriâm. Kơvâ ngăn Hnê hriâm kong pơlê Dak Lak dế tơbleăng troăng hơlâ xúa liăn ngân tơnêi têa vâ rôe hlá mơ-éa hriâm, djâ ‘măn a tíu ‘măn rak hlá mơ-éa dêi hngêi trung vâ ăm hok tro mung hriâm. Laga, tung pơla pêi pro dế trâm xơpá xua ôh tá ai xiâm hlá mơ-éa ki vâ rôe.

Tiô jâ Lê Thị Kim Oanh, Phŏ kăn ngăn ‘na Hnê hriâm ƀă Hnê mơjiâng tuăn ngôa rơkê kong pơlê Dak Lak tối, khu pơkuâ ngăn hiăng krếo tơpui tơno ƀă tíu chêh in, tăng ngăn xiâm hlá mơ-éa mâu kong pơlê ki achê la xuân hâi ai tŭm kơxô̆ hlá mơ-éa vâ tơkŭm rôe tơdjuôm.

“Nôkố Khu xiâm ngăn hnê hriâm ƀă hnê mơjiâng tuăn ngôa rơkê kong pơlê hiăng pêi cheăng ƀă mâu tíu pêi cheăng chêh pro hlá mơ-éa, Khu in tơbleăng Hlá mơ-éa Hriâm Việt Nam ƀă Khu xiâm ngăn hnê hriâm ƀă hnê mơjiâng tuăn ngôa rơkê vâ tơbleăng tơdroăng xơpá, pâ thế ai troăng hơlâ tah ki xơpá ‘na xiâm chêh in tơbleăng. Ki hdrối, cho rĕng ai tơ’nôm hlá mơ-éa ki ối kal vâ, vâ tơniăn ăm hok tro ai tŭm hlá mơ-éa vâ hriâm”.