Pôa Trần Thanh Mẫn, Kăn xiâm hnê ngăn Kuô̆k hô̆i ăm 'nâi, Hneăng hôp ôh tá xê tiah hmâ roh má Môi dêi Kuô̆k hô̆i hneăng XVI nếo klêi tơniăn lĕm, tơbleăng 15 luât, 6 tơdroăng pơkâ ai tơdroăng pơkâ luât ƀă 7 tơdroăng pơkâ 'na mơnhông cheăng kâ - rêh ối. Kăn xiâm hnê ngăn Kuô̆k hô̆i tơmâng xo, khĕn kơdeăn hiâm mơno hbrâ rơnáu, pôu râng hnoăng cheăng, mơ-eăm khât dêi mâu kơ koan. Troh a chôu phut kố, Kăn xiâm hnê ngăn Kuô̆k hô̆i hiăng kĭ vâ chê tâi tâng mâu luât, tơdroăng pơkâ dêi Hneăng hôp ôh tá xê tiah hmâ roh má Môi.

Rôh hôp má 6 dêi Vi ƀan pơkuâ Kuô̆k hô̆i châ tơkŭm po chiâng 2 rôh, ton vâ chê 6 hâi, séa ngăn lối 40 tơdroăng ki kal. Tiô Kăn xiâm hnê ngăn Kuô̆k hô̆i, kố cho rôh hôp ki kal ‘na mơjiâng luât, tơdrêng amê hlối cho rôh vâ hbrâ ăm pêi tơdrêng, kal khât ăm Hneăng hôp má 2 dêi Kuô̆k hô̆i hneăng XVI. Tung tơdroăng mê, Kăn xiâm hnê ngăn Kuô̆k hô̆i pơkâ thế tơkŭm mơnhông ahdrối. Rôh hôp kố, Vi ƀan pơkuâ Kuô̆k hô̆i kô ăm rơkong tơpui ƀă 31/41 tơdroăng tơkêa bro luât, tơdroăng pơkâ ki vâ pơtroh ăm Kuô̆k hô̆i a Hneăng hôp má 2; hên tơdroăng tơkêa bro ai tơdroăng ‘mâi rơnêu trâu rơdâ, tơdjâk kân troh tơdroăng cheăng dêi kơ koan cheăng tơnêi têa, kuăn pơlê, khu mơdró kâ ƀă tơdroăng cheăng kâ.

Kăn xiâm hnê ngăn Kuô̆k hô̆i pơkâ thế, tơdroăng cheăng hên, hâi khế rĕng, la ôh tá xê xua hâi khế mê kơdroh ki dâi lĕm. Mâu kơ koan pơtroh thế hbrâ rơnáu hồ sơ khât, rak tơniăn krá 'na kal kí, luât, khoa hok ƀă tơdroăng ki ai khât; troăng hơlâ thế nhên, tơƀrê, tơleăng tro tơdroăng ki ai khât. Vi ƀan pơkuâ Kuô̆k hô̆i tơkŭm tơpui tơno mâu tơdroăng ki kân, mâu tơdroăng ki ối tơpui phá tơ-ê dêi pó, mâu tơdroăng ki chiâng pro pơ'lêh khât.

"Tơdroăng kal cho: luât athế nhên tâ, tơdâng tâ, tơ’lêi prri pto tâ; athế lêi tah mâu tíu ki tro kreăng, pro phuâng lĕm ăm kơxô̆ liăn ƀă po rơdâ ăm tơdroăng mơnhông. Má péa, athế pêi pro kơtăng tiô luât pơkâ ƀáw hbrâ ăm Hneăng hôp. Drêng séa ngăn Tơdroăng mơjiâng luât hơnăm 2027, á pâ thế rah xo tơdroăng ki kal, ki xiâm; kơjo gum mâu tơdroăng kal pêi pro tơdrêng, mâu tíu tro kreăng vâ troăng hơlâ ƀă mâu kơvâ cheăng nếo kal chêh pro klêi luât vâ thăm mơdêk mơnhông. Á tối nhên, chêh inâi tung Tơdroăng cho tơhrâ ‘na hnoăng cheăng pôu râng. Kơ koan ki lâi  mơ’no tơdroăng tơkêa bro, mơnhên hâi khế pơtroh mê athế hbrâ rơnáu, rak tơniăn tơdroăng pro ƀă krá kâk;’mâi mơnhông tơdroăng chêh hên inâi, la klêi mê pâ ton tá rŏng, pâ pơtê, chiâng tơdjâk troh tơdroăng pơkâ pêi tơdjuôm”.

Kăn xiâm hnê ngăn Kuô̆k hô̆i pơkâ thế Chin phuh séa ngăn kơtăng mâu khu xiâm, kơvâ cheăng chêh inâi klêi mê pâ pơtê lơ tah pro tơdjâk tơdroăng tơdjuôm. Xua mê thế kơtăng, khŏm mơ-eăm pêi pro vâ tah lôi pá puât, tơvâ tơvân, vâ tơnêi têa mơnhông tung tơdroăng nếo ƀă pơkâ mơdêk péa kơxô̆.

Ăm 'nâi Hneăng hôp má 2 Kuô̆k hô̆i tiô tối hdrối séa ngăn vâ chê 60 tơdroăng ƀă hên tơdroăng kal ki khât, Kăn xiâm hnê ngăn Kuô̆k hô̆i pơkâ thế kal hbrâ rơnáu sap ing hdrối, ing hơngế, tơrŭm sap ing apoăng; bú ăm mot tung tơdroăng ki kal khât tŭm tơdroăng. Kăn xiâm hnê ngăn Kuô̆k hô̆i tối pơchân tơdroăng mơgêi Hneăng hôp ôh tá xê tiah hmâ rôh má Môi thế tơdrăng, vâ mơnhên mâu túa pêi pro ki tro vâ pơtối mơnhông, pro tơniăn; tơdrêng amê hlối tối nhên mâu tơdroăng ki tá hâi pêi pro klêi, xiâm kối ƀă troăng hơlâ 'mâi rơnêu, thế tối tơdrăng, tối khât. Mơgêi cho vâ pêi pro tro tâ, ôh tá xê to vâ mơgêi môi hneăng hôp.