A rôh hôp Chin phuh tiah hmâ ‘na klêi kơ’nâi ‘mot tơkŭm thôn, tôh kơphô̆ tung lâp tơnêi têa, jâ Nguyễn Thị Hà, phŏ ngế xiâm ngăn kong pơlê, cheăm bêng ƀă hnoăng cheăng mâu kăn ƀô̆ ăm ‘nâi, 34/34 to kong pơlê, pơlê kong kân ối tung Tơnêi têa hiăng pêi pro klêi tơdroăng ki ‘mot tơkŭm thôn, tôh kơphô̆ tro tiô pơkâ thế dêi Khu xiâm cheăng kal kí ƀă Chin phuh. Klêi kơ’nâi ‘mot tơkŭm, thôn, tôh kơphô̆ tung lâp tơnêi têa kơdroh sap ing 89.589 chu ối 48.078 (kơdroh 41.511 tíu pêi cheăng, tơ’mô ƀă kơdroh 46,33%).

Tiô phŏ ngế xiâm ngăn kong pơlê cheăm bêng ƀă hnoăng cheăng mâu kăn ƀô̆, tơdroăng ki klâ xoăng ôh tá xê to pro lế lê̆m tíu pêi cheăng mê ối mơdêk túa pơkuâ ngăn, mâu thôn, tôh kơphô̆ châ tiô pơkâ châ mơdêk ƀă ‘mâi mơnhôngtơdroăng pơkâ kŭn, u tâi utá; hlối ối rak tơniăn mâu thôn, tôh kơphô̆ ai tơdroăng cheăng ôh tá chiâng lôi, túa lĕm tro, hdrông kuăn ngo, tơdroăng tiô khôp, cheăm bêng gâk kring ƀă tíu ối tơnêi tơníu.