Tơdế  rơnó tô mơdrăng Tây Nguyên, cheăm Rờ Kơi, tơring Sa Thầy, kong pơlê Kon Tum xuân hlo ngiât lối 4.200 hectar loăng plâi kâ. A kơpong tơkăng kong kố hiăng ai hngêi kơmăi pro cháa kơxu, kơdroăng păn mơnăn xúa kơmăi ki dâi lěm, tíu pêt loăng plâi xúa kơmăi ki dâi lěm... Pôa A Êl, krâ pơlê Gia Xiêng, ăm ‘nâi, tíu tơkăng kong Rờ Kơi nôkố ôh pá xê kơpong hơngế, kơpong xơpá xếo:  

“Pơchông ƀă hdrối nah, drêng hlo hên ki pơ’lêh, ing kuăn mơngế, ếo xâp, tơpui kâ troh tơdroăng mơnhông cheăng kâ. Tung mâu hơnăm achê kố mơnhông rơdêi. Nôkố kuăn pơlê kơdroh pêt pôm loăng, pêt hên kơphế, kơxu. Kuăn pơlê rak vế pêi pro tiô troăng hơlâ dêi Đảng, luât Tơnêi têa”.

Kong pơlê Kon Tum ai 13 to cheăm tơkăng kong achê ƀă 2 kong têa pú cho Lếo ƀă Kul. Tung mâu hơnăm tơplâ xâ Mih, kố cho kơpong ki xiâm Mih Ngŭi plâ tơ’nhiê ó vâ mơdât ôh tá ăm Mố đô̆i pin lut blong plâ a troăng Trường Sơn ki vâi ô eăng mê nah. 50  hơnăm klêi tơnêi têa châ tơleăng lěm, tơdrêng ƀă troăng kân Hồ Chí Minh, Troăng kân 14C châ ‘no liăn pro tơdjêp ƀă tâi tâng troăng tơkăng kong xŏn lối 292km.

Sap kơpong tơnêi tro tơ’nhiê hrêi hrěng xua pháu kơnŏng, răng ƀom, trếo ‘mêi kơ’nêh rôh tơplâ nah, Kon Tum hiăng mơ-eăm mơnhông rơdêi. Hơnăm nah, tâi tâng tơmeăm pêi lo tung kong pơlê châ vâ chê 50.000 rơtal liăn; riân rêm ngế kuăn pơlê pê lo châ lối 68 rơtuh liăn; pêi cheăng kâ tâk châ 8,02%, ối má 24 tung lâp tơnêi têa  ƀă hên má môi kơpong Tây Nguyên.

Pôa Nguyễn Tấn Liêm. Ngế pơkuâ ngăn ‘na Chiâk deăng ƀă Hyôh kong prâi Kon Tum, ăm ‘nâi, kơvâ pêi chiâk deăng ai mâu hnoăng veăng ‘no ki kal ƀă tơdroăng mơnhông cheăng kâ dêi kong pơlê:

“Tung 4 hơnăm achê kố, mê cho hơnăm 2021 kơvâ pêi chiâk  ngin tâk châ 5,75% ối má 5 tung kơpêng 63 to kong pơlê, pơlê kong kơdrâm. Hơnăm 2022 pêi cheăng kâ tâk châ 6,19% ối má môi. Hơnăm 2023 pêi kâ tâk châ 6,76% ối má 5 ƀă hơnăm 2024 tâk châ 5,97% ối má 2. Tung 4 hơnăm  achê kố cheăng kâ tâk châ ối tung top má 5 tung lâp tơnêi têa”.

Khên tơnôu mơ-eăm xông rơdêi, kong pơlê Kon Tum hiăng mơjiâng 2 kơpong cheăng kâ xiâm mê cho pơlê kong kơdrâm Kon Tum ƀă tơring Kon Plông. Pơtối rak tơmeăm khoăng ai hlâu, kong pơlê hiăng mơjiâng kơpong pêt nhâ loăng pơkeăng tơkŭm pêt hên a 3 tơring Tu Mrông, Đăk Glei, Kon Plông ƀă tâi tâng deăng pêt lối 13.000 ha, tung mê ai lối 2.900 hectar sâm Ngoc Linh. Kơpong ôm hyô ngăn nhâ loăng tơnêi têa Mang Deang a tơring Kon Plông chiâng tíu tơ’mot hên tơmối tung tơnêi têa ƀă kong têa ê vâ troh  ôm hyô...

Hlo hên tơdroăng pơkâ tơbâ tơdroăng ton nah tung Chal nếo mơnhông tơná dêi hdroâng mơngế, pêi pro tiô hnê mơ hno dêi Tíu xiâm Tơnêi têa, kong pơlê Kon Tum hiăng pêi pro tiô pơkâ xing xoăng tơkŭm pro rế lěm mâu kăn  ƀô̆ pêi cheăng ăm tơnêi têa tiô troăng hnê mơhno rah iâ mơngế cheăng, pro rê lěm, pêi cheăng rơdêi, pơxúa tơƀrê”. Pôa Dương Văn Trang, Ngế cheăng tung tíu xiâm Đảng Kăn hnê ngăn Đảng kong pơlê  Kon Tum, ăm ‘nâi tâi tâng khu cheăng kal kí dêi kong pơlê dế mơ-eăm pê klêi tơdroăng pơkâ tâk 10 hơnăm 2025, hên má môi kơpong Tây Nguyên:

“Tung la ngiâ kô ối hên tơdroăng cheăng pêi tơdrêng ki kal, kal thế tâi tâng khu cheăng Kal kí thế mơ-eăm pêi, pêi kơtăng khât ƀă tơdroăng thâ pêi rěng, kơtăng ƀă ‘nâi hnoăng cheăng tơná. Tơrêm ngế tung râ ủy, khu kăn hnê ngăn kơ koan tíu pêi cheăng hnê mơhno tơdrêng pơtối rak hnoăng cheăng ki djâ troăng ahdrối, tơrŭm môi tuăn, rơtế ‘no ivá, mơno tơkâ luâ tŭm tơdroăng pá pơloăng mơnúa pê klêi hnoăng cheăng pơcháu tơxâng ƀă ki loi nhoăm dêi Đảng ƀô̆ ƀă Kuăn pơlê dêi kong pơlê tơná”.

Tơdế chal klêi hâi châ tơleăng lěm, ing kơpong tơnêi chiu pôu hên tơdroăng châi heăng rong râ, hlâ xua tơplâ, Kon Tum dế mơ-eăm mơnhông tơná chiâng môi tíu bâ eăng mơnhông dêi Tây Nguyên. Mot tung hơnăm nếo, ƀă tơdroăng mơ-eăm khât, Kon Tum dế choâ rêm hâi mơhno ki rơdêi tơná, tơmiât pêi cheăng kôm châ tâk rěng, krá tơniăn, tơxâng inâi kơpong tơnêi khên tơnôu.