Hâi lơ 25/9, Kong pơlê Gia Lai tơkŭm po kân krip Hneăng hôp Tơ’noăng pâ nhuô̆m tơnêi têa roh má I, hneăng hơnăm 2025 – 2030, ƀă veăng amê ai 600 kăn teăng mâ ki rơkê tung mâu kơvâ. 5 hơnăm hiăng hluâ, tơdroăng tơ’noăng pâ nhuô̆m tơnêi têa a Gia Lai hiăng châ hên tơdroăng châ tơƀrê hên: tơtêk cheăng kâ tơdâng vâ chê 7%/hơnăm; Gâk kring tơnêi têa – gâk kring tơniăn châ rak krá, tíu mơ’no liăn cheăng, tê mơdró pơtối châ pơhlêh tơniăn.

A hneăng hôp, mâu ngế ki kơhnâ rơkê hiăng tối túa ki rơkê tơtro, troăng pêi tơmiêt rơkê, tung mê ki má môi mơtiah: Mô đô̆i gâk tơkăng kong kong pơlê ƀă tơdroăng ‘’Kum o troh hngêi trung, tŏng gum rơpŏng kơtiê a kơpong tơkăng kong’’; troăng tơmiêt xúa kih thuât nếo tung khăm pơlât a Hngêi pơkeăng pơlât Mâ Gia Lai; tơdroăng dêi nâ H’Uyên Niê (cheăm Ia Ly) ƀă troăng pêi ôm hyô pơlê pơla ƀă rak tơdroăng teăn ếo pơtâk, mơjiâng cheăng pêi ăm kuăn pơlê hdroâng kuăn ngo...Tung hneăng hơnăm 2025 – 2030, tơdroăng tơ’noăng pâ nhuô̆m tơnêi têa dêi kong pơlê Gia Lai kô tơkŭm a 4 khu hnoăng cheăng ki xiâm. Mê cho: pơtối mơjiâng Đảng ƀă khu cheăng kal kí iâ mơngế, pêi cheăng rơkê, pêi cheăng châ tơƀrê; mơdêk rơdêi mơnhông cheăng kâ krúa lĕm, pêi chiâk deăng xua kŏng ngê̆ rơxông nếo, kơmăi kơmok uâ mơdiê tơmeăm ƀă on tơhrik ki vêh pro; mơnhông mơdêk khôi túa lĕm tro – rêh ối pơlê pơla, mơdêk tơdroăng rêh ối Kuăn pơlê; tơdrêng amê rak krá gâk kring tơnêi têa – gâk kring tơniăn ƀă po rơdâ tơrŭm cheăng tơpui kâ ƀă kong têa ê, ki rơhêng vâ tối ƀă mâu kong pơlê Peăng hdroh Lếo ƀă Peăng mâ hâi lo Pá kơnhŏng kong têa Kul.