Pôa Nguyễn Xuân Thắng, Kăn xiâm pơkuâ Hok viê̆n Cheăng kal kí tơnêi têa Hồ Chí Minh vêh mơnhên: Đảng pơtối pơhlêh ó rơdêi hên tâ nếo ‘na tuăn tơmiât ki pơhlêh păng ‘nâng tung troăng hơlâ pơkâ mơnhông ton xŏn la ngiâ, tung pơtối mơnhông tơdroăng ki hloh hlê rơkê plĕng, vâ ing mê thăm mơdêk ivá ki rơkê, tuăn mơno, hiâm chân pơkuâ ngăn ƀă hnoăng cheăng pêi pro krá tơniăn ton tung pơkâ pêi pro tiô troăng hơlâ dêi Đảng.

Rơnó Hơngui hơnăm 1930 Đảng Kŏng san Việt Nam hiăng châ mơjiâng nah, hdró kơlo ki kal khât tung tơdroăng roh ton nah dêi kăch măng Việt Nam. A roh hôp mơjiâng Đảng (po ing hâi lơ 6/1 troh hâi lơ 7/1/1930), Đảng Kŏng san Việt Nam hiăng vêh mơnhên troăng prôk ki mơnhông dêi kăch măng Việt Nam cho: “Gum pro hnoăng ki kro mơdrŏng krê kăch măng ƀă tơnêi tíu kăch măng vâ prôk troh troăng hơlâ xah hô̆i chuh ngiah kŏng san”, rak vế, pêi pro tiô troăng cheăng xiâm: “Rak tơniăn krê hdroâng kuăn ngo ƀă chuh ngiah xah hô̆i”.

Ƀă troăng prôk dêi kăch măng tro troăng, khoa hok ƀă hloh hlê rơkê plĕng, sap ing hâi châ mơjiâng nah troh nôkố, Đảng Kŏng san Việt Nam đi đo rak vế krá tơniăn hnoăng tơniăn krê hdroâng mơngế ƀă troăng hơlâ chuh ngiah xah hô̆i, pơkuâ tơdjâ kuăn pơlê Việt Nam đi đo krá kâk, tơniăn tung hnoăng ki rak tơniăn krê xêh hnoăng cheăng kuăn ngo ƀă chuh ngiah xah hô̆i, pơkuâ ngăn kuăn pơlê Việt Nam mơjiâng pro chiâng mâu troăng hơlâ ki ƀlê trâng tơniăn kân, pêi pro tiô hnoăng cheăng xiâm tung mơjiâng tơnêi têa Việt Nam kuăn pơlê kro, tơnêi têa rơdêi, pêi pro tiô hnoăng kuăn pơlê pói rơhêng vâ, tơdâng tơ’mô, hloh hlê rơkê plĕng. Phŏ Yăo sư - Tiê̆n sih Bùi Đình Phong, Hok viê̆n cheăng kal kí tơnêi têa Hồ Chí Minh vêh mơnhên tối:

“5 hơnăm kơnôm ai tơdroăng pơkuâ ngăn dêi Đảng pin khoh châ chiâng ai hnoăng cheăng ki kal kân tiah nôkố, mê cho 3 tơdroăng cheăng ki kân xiâm. Ki má môi, athế vêh mơnhên hnoăng pơkuâ ngăn tro troăng dêi Đảng cho ki xiâm pơkâ mâu tơdroăng ki ƀlê trâng dêi hnoăng cheăng kăng măng. Tơdroăng ki má péa xuân cho kal há, mê cho pin kal athế châ rak vế, pơkuâ dêi hlá cơ tơniăn krê hdroâng mơngế ƀă chuh ngiah xah hô̆i. Kố cho môi troăng hơlâ ki rơkê plĕng ‘na tơdroăng tơpui leăng ki Pôa Hồ hiăng djâ troăng mơjiâng Đảng ƀă ing mê, pin khoh châ ƀlê trâng. Tơdroăng ki má pái mê cho ivá dêi kuăn pơlê cho ki xiâm dêi tơdroăng ƀlê trâng kăch măng”.

Mâu hnoăng cheăng ki kal dêi 95 hơnăm xuân hiăng ‘mâi mơnhông troăng hơlâ, mơjiâng chiâng ivá ki ó rơdêi vâ Đảng pơtối pơkuâ xiâm tơnêi têa krá tơniăn tung chal ki mơnhông dêi tơná a hneăng ki nếo dêi hdroâng mơngế. Phŏ Yăo sư - Tiê̆n sih Nguyễn Viết Thảo, Ngế cheăng tung Hô̆i đong tơpui leăng Tơnêi têa vêh mơnhên:

“Troăng prôk ki vâ troh a chal ki mơnhông dêi tơná cho athế mơjiâng môi tơnêi têa Việt Nam xah hô̆i chuh ngiah khên tơnôu, kro rơdêi, hloh hlê rơkê plĕng, vâ tơxâng ƀă mâu kong têa ki kân tung 5 pâ lâp plâi tơnêi môi tiah Pôa Hồ hiăng tối a hơnăm 1945, mê cho troăng hơlâ ki vâ pêi pro troh amê. 2 hnoăng cheăng xiâm cho nhên, troh a hơnăm 2030 ah athế chiâng tơnêi têa ki dế mơnhông, ai túa pêi cheăng kơmăi kơmok chal nếo, pêi lo kế tơmeăm liăn ngân hên, vâ troh a hơnăm 2045 ah chiâng tơnêi têa xah hô̆i chuh ngiah mơnhông, châ pêi lo liăn ngân hên. Á pâ phep tối rơdêi, cho tơnêi têa xah hô̆i chuh ngiah, tơdâng tơ'mô, pêi pro tiô hiâm mơno kuăn pơlê púi rơhêng vâ, hloh hlê rơkê plĕng, kro mơdrŏng, hơniâp niân”.

Roh hôp khoa hok tơnêi têa: “Đảng Kŏng san Việt Nam – 95 hơnăm krá kâk tuăn mơno ki xiâm tơniăn krê hdroâng kuăn ngo ƀă chuh ngiah xah hô̆i, mơjiâng tơnêi têa kro rơdêi, hơniâp ro”

A chôu phut hôp mê, pôa Nguyễn Xuân Thắng, Kăn xiâm pơkuâ Hok viên Cheăng kal kí tơnêi têa Hồ Chí Minh tối tiah kố, vâ rak vế, pêi pro ƀlê trâng mâu hnoăng cheăng xiâm troh a hơnăm 2030 ah, hnoăng cheăng vâ pêi pro troh a hơnăm 2045 ah nếo, Đảng pơtối pơhlêh ó rơdêi, ai mâu troăng hơlâ ki pơkâ nhên, ó rơdêi, pơtối hiâm mơno ki hloh hlê rơkê plĕng, ôh ta pơtê hnoăng cheăng ki rơkê plĕng, hnoăng cheăng kal kí ƀă hnoăng cheăng ki vâ pêi pro troh ki rơkê plĕng tro tiô troăng hơlâ, troăng tơdjâ:

“Đảng kal pơtối pơhlêh nếo ó rơdêi ‘na tuăn tơmiât ki vâ mơnhông, tơkéa vâ tối kal athế ai pơhlêh nhên khât tung pơkâ mâu hnoăng cheăng vâ pêi pro la ngiâ, tung mơnhông cheăng ki rơkê plĕng ôh ta la lâi pơtê, vâ thăm mơdêk tuăn ngoâ ki rơkê plĕng, tuăn hlế rơkê khât, hiâm mơno kâi chân tung pơkuâ ngăn ƀă hnoăng cheăng vâ pêi pro trâu rơdâ tung pơkâ mâu troăng cheăng krá tơniăn ton dêi Đảng. Kal athế hnê tối, pơkuâ djâ trâu rơdâ hiâm mơno ki vâ pêi pro tung plâ to lâi rơxông dêi Đảng, mê cho “Mơnhông rĕng ƀă krá tơniăn ăm tơnêi têa”, tung mê, mơnhông pêi cheăng kâ-rêh ối pơlê pơla ƀă kring vế, rak ngăn tơnêi tíu, hyôh kong prâi cho hnoăng cheăng xiâm, mơjiâng Đảng pơtối cho hnoăng cheăng ki xiâm, kăn ƀô̆ cho “ki kal dêi tơdroăng ki kal”; mơnhông túa lĕm tro ƀă kuăn mơngế cho ki xiâm. Kố cho ivá ki xiâm vâ mơnhông pêi lo kế tơmeăm, chĕm mơ’drêh dêi ki xiâm, ivá xiâm ƀă tơdroăng ki vâ mơnhông xiâm”.

Xông tơpui a roh hôp mê, pôa Nguyễn Trọng Nghĩa, Kăn xiâm hnê mơhno cheăng kal tơnêi têa tối nhên, hiâm mơno ki hâk tơngăm dêi hnoăng cheăng 95 hơnăm Đảng pơkuâ ngăn Kăch măng Việt Nam, ƀă hnoăng cheăng xiâm pơtối mơdêk mơjiâng, tơbêng thăm a’ngêi mâu hnoăng cheăng cheăng, ki kơnía git dêi Đảng. Pôa Nguyễn Trọng Nghĩa loi tơngah Hneăng hôp kố kô gum kơhnâ khât ăm hnoăng cheăng ki hriăn plĕng, hnê mơhno, hnê hriâm hiâm tuăn ki bâ eăng dêi Pôa Hồ Chí Minh, mâu kăn kăch măng chal rơxông hdrối mê hía nah, hnê hriâm tuăn hiâm mơno ki bâ eăng dêi pôa Hồ Chí Minh - Kăn xiâm hnê ngăn tơnêi têa hneăng hdrối nah, mâu kăn pêi hnoăng cheăng kăch măng chal hdrối nah, khu râ đảng viên ki môi hiâm tuăn, khên tơnôu ƀă hên mâu tơdroăng ki ê ăm hâi kố ƀă la ngiâ ah.

Thăm mơdêk tơbêng i pêng, thăm mơnhông hên tâ nếo tuăn loi tơngah dêi kuăn pơlê ƀă Đảng, mơjiâng chiâng tơdroăng ki tơrŭm môi tuăn ‘na hiâm tuăn, tuăn mơno ƀă tơdroăng pêi pro tung tâi tâng Đảng, tâi tâng kuăn pơlê, tâi tâng khu lêng, xua Việt Nam “hơniâp lĕm, krá tơniăn, pêi pro tiô tuăn hiâm kuăn pơlê pói rơhêng, kro rơdêi, hloh hlê rơkê plĕng, hơniâp lĕm, krá chêng prôk tâk tiô troăng chuh ngiah xah hô̆i”.