Pơtối mê, pôa Shantanu Chakraborty kô pơkuâ mâu tơdroăng pêi cheăng dêi ADB a Việt Nam, teăng mâ ăm hngêi arak liăn tung tơpui tơno troăng hơlâ ƀă thăm pêi pro tâ mê nếo tơrŭm cheăng dêi hngêi arak liăn ƀă Chin phuh ƀă rêm pâ ki tơdjâk ki ê. Pôa kô séa ngăn tơdroăng pêi pro troăng pêi ton xŏn tơnêi têa ăm Việt Nam hneăng hơnăm 2023 – 2026, tơkŭm tung tơdroăng hơ’lêh tíu dêi Việt Nam hơ’lêh pêi cheăng kâ krúa lĕm, xúa mâu tơmeăm ki ai hlâu dêi kơpong krê ƀă thăm pêi pro tơdâng pơlê pơla.

 Pôa Shantanu Chakraborty tối, kong têa Ấn Độ ai vâ chê 28 hơnăm tung pêi tơdroăng cheăng ‘na hngêi arak liăn a peăng hdroh châu Á, peăng tơdế ƀă peăng mâ hâi luô châu Á xuân môi tiah a kong têa Mih. Tung mê, ai 18 hơnăm pêi cheăng a ADB. Pôa nah cho ngế kum cheăng râ xiâm ăm Kăn xiâm phŏ hnê ngăn (tơdroăng cheăng kơpong krê ƀă rơtế tŏng kum) ƀă ngế ki rơkê mơ’no liăn cheăng xiâm râ kân.