Ngế pro xiâm hnê ngăn tơnêi têa tối nhên, tơdroăng tơkêa bro troăng kân ăm phêp rơxế kơtâu têi Pơlê kong kân Hồ Chí Minh - Thủ Dầu Một – Chơn Thành cho tơdroăng tơkêa bro troăng kân tiô troăng pêi dêi Đảng, kuăn pơlê vâ môi tuăn, kố cho pơkâ dêi plâi nuih vâ pâ mơnê mâu ngế hiăng pleăng hnoăng cheăng xua tơnêi têa xua mê thế khŏm pêi pro chiâng, ôh tá tối tê kơtê, ôh tá tối pá, ôh tá tối ai mê ôh tá pêi, ôh tá chiâng tơkôm, thế pêi pro kơtăng, hiăng tối thế pêi, hiăng pêi, hiăng pro cho thế lo tơmeăm.

‘’Á pơkâ thế mâu kong pơlê Bình Phước cho môi, Pơlê kong kân Hồ Chí Minh, Bình Dương tung pái khế apoăng hơnăm kố thế pêi kêi đeăng mâu mơ-éa tơdjêp troăng kân Dak Nông troh Chơn Thành. Kố cho tiô troăng pêi dêi Đảng, kuăn pơlê môi tuăn, kuăn pơlê tơkôm khât, tơdroăng mơnhông mê pơkâ cho thâ. Xua mê, á pơkâ thế mâu ngế ki pêi ôh tá chiâng tơkôm, ôh tá hrá xếo, ƀă thế pêi tro hnê mơhno, pơkuâ dêi Ngế pro xiâm hnê ngăn Chin phuh, pêi pro kơtăng, ôh tá ai tối hiăng klêi lôi amê, hiăng tối cho thế pêi, hiăng tơkêa cho thế pêi pro, hiăng pêi, hiăng pêi pro cho thế lo tơmeăm, mê cho pơkâ dêi plâi nuih ƀă pin thế pâ mơnê mâu ngế hiăng hlâ, mâu ngế hiăng pleăng dêi tơdroăng cheăng mê kơpong tơnêi kố tơdroăng cheăng ki nhên ôh tá xê tơpui tơdjuôm xếo ƀă thế pêi pro khŏm chiâng. Á pơkâ thế mâu ngế pêi thế vêh tơmiât pro ti lâi lơ 2/9/2026 leh tơbâ 81 hơnăm hâi mơjiâng tơnêi têa pin cho hiăng ăm chiâng prôk lăm, xua mê mâu ngế ki mơjiâng pro thế pêi kơtăng tâ mê’’.

Ngế pro xiâm hnê ngăn tơnêi têa tối ăm ‘nâi, lâp tơnêi têa dế tơkŭm 3 tơdroăng mơnhông ton xŏn cho mơnhông ‘na pơkâ, hngêi trăng, ƀă mâu ngế pêi cheăng rơkê, Ngế pro xiâm hnê ngăn tơnêi têa pói vâ kong pơlê Bình Dương prôk hdrối tung 3 roh châ tơƀrê hluâ kố cho roh châ tơƀrê hluâ kố ‘na pơkâ pêi gum pơhlêh nếo pơkâ pêi ing tơrŭm cheăng tơnêi têa ngế krê, mơ’no liăn cheăng vâ tah lôi mâu tíu ki kreăng dêi tíu kreăng, tơdrêng amê djâ troăng ahdrối mơjiâng troăng klông tơdjêp kơpong.

Tơdroăng tơkêa bro troăng kân ăm phêp rơxế kơtâu têi pơlê kong kân Hồ Chí Minh - Thủ Dầu Một - Chơn Thành kơpong tơkâ hluâ kong pơlê Bình Dương xŏn lối 52 km, châ pơkâ pêi pro 6 hơlâ troăng kân ăm phêp rơxế kơtâu têi, kơtâu châ 100km/h. Kố cho troăng kân ăm phêp rơxế kơtâu têi apoăng tơdjêp Pơlê kong kân Hồ Chí Minh ƀă Bình Dương, Bình Phước ƀă pơtối tơdjêp ƀă troăng kân ăm phêp rơxế kơtâu têi Gia Nghĩa – Chơn Thành vâ tơdjêp to Tây Nguyên.

Hneăng má 1, tơdroăng tơkêa bro troăng kân ăm phêp rơxế kơtâu têi pro 4 hơlâ troăng ăm phêp rơxế kơtâu têi, troăng kân tot pơtê thâ đi đo lâp troăng kân, ki kân rơdâ dêi troăng kân 25,5 met. Tâi tâng kơlo mơ’no liăn lối 8.833 rơtal liăn, châ pêi pro tiô troăng tơnêi têa - ngế krê (PPP). Hâi khế pêi pro 36 khế sap ing hâi kĭ mơ-éa môi tuăn ai xêt khât.

Troăng kân ăm phêp rơxế kơtâu têi pơlê kong kân Hồ Chí Minh - Thủ Dầu Một – Chơn Thành tơdjêp ing troăng kân Pakĭng 3 Pơlê kong kân Hồ Chí Minh pơlê krâm Chơn Thành, kong pơlê Bình Phước, mơjiâng ivá mơnhông ăm kơpong Đông Nam Bộ, po rơdâ tíu kơdrâm kuăn pơlê rêh ối ƀă kơmăi kơmok. Drêng troăng kân ăm phêp rơxế kơtâu têi Chơn Thành - Gia Nghĩa kêi đeăng, kô pơtối tơdjêp ƀă kơpong Tây Nguyên, mơjiâng tơdjêp kơpong, mơdêk mơnhông cheăng kâ - rêh ối pơlê pơla, tơdrêng amê tơniăn gâk kring tơnêi têa, gâk kring tơniăn.

Tơdroăng tơkêa bro troăng kân xuân kum pêi pro pơkâ 5.000km troăng kân ăm phêp rơxế kơtâu têi ki Đảng ƀă Chin phuh hiăng pơkâ mơ’no tung hneăng hơnăm 2021 – 2030.

Ngế pro xiâm hnê ngăn tơnêi têa tối rơdêi, hơnăm 2025 cho hơnăm châ tơƀrê hluâ pơkâ tơmiât troh Hneăng hôp Đảng lâp tơnêi têa roh má XIV, Ngế pro xiâm hnê ngăn tơnêi têa pơkâ thế kong pơlê Bình Dương tơkŭm po lĕm tro Hneăng hôp Đảng mâu râ; tơkŭm po lĕm tro mâu hâi leh, hâi leh tơbâ kân dêi tơnêi têa; veăng gum po rơdâ mơgêi pêi pro Pơkâ 18 dêi Tơnêi têa ‘na rah xo bro lế lĕm tro, rah xo tro khu râ kăn pơkuâ tơnêi têa; vêh séa ngăn mâu pơkâ, hnoăng cheăng vâ pêi lĕm tro tâ nếo, châ tơƀrê hơnăm 2025 hên tâ hơnăm 2024 ƀă kêi đeăng mâu pơkâ, hnoăng cheăng dêi plâ hneăng.

Ƀă troăng xŏn bu lối 50 km dêi tơdroăng tơkêa bro troăng kân, Ngế pro xiâm hnê ngăn tơnêi têa pơkâ, kơdroh hâi khế mơjiâng pro, pêi cheăng 3 ca, 4 kíp, kâ hlối koi thâ vê troh hâi lơ 2/9/2026 ăm rơxế prôk lăm a troăng kân vâ mơjiâng tíu mơnhông, Ngế pro xiâm hnê ngăn tơnêi têa loi tơngah mâu khu xiâm, kơvâ cheăng kong pơlê kô chiâng pêi.

Ngế pro xiâm hnê ngăn tơnêi têa pơkâ Pơlê kong kân Hồ Chí Minh, Bình Dương, Bình Phước, Tây Ninh thế pêi pro kơtăng tro tơdroăng pơkâ, tơniăn inhên, lĕm ƀă thế tŏng gum tơdroăng rêh ối dêi kuăn pơlê hiăng ăm tíu ối dêi tơná vâ pro troăng kân, tơdroăng mê cho tíu ối nếo thế lĕm tâ tíu ối ton, tơdrêng amê tơtrâ mơdât tơdroăng ki ôh tá lĕm tro, kâ kơhveăm liăn ngân, thế pêi cheăng lĕm, xua kuăn pơlê, xua tơdroăng mơnhông dêi tơnêi têa.